Astanada múgedekterdi tegin tasıtyn ınvotaksılerdiń sany kóbeıtilmek
ASTANA. QazAqparat - Astanada múgedekterdi tegin tasıtyn ınvotaksılerdiń sany kóbeıtilmek. Bul týraly Astana qalalyq Jumyspen qamtý jáne áleýmettik baǵdarlamalar basqarmasynyń basshysy Lázzat Ábýeva málim etti.
Onyń aıtýynsha, ınvotaksıler qala bıýdjeti negizinde múgedek azamattardy tegin tasıdy.
«Bul olardyń jumysqa nemese oqý oryndaryna qatynaýyna óte qajet. Qazirgi ýaqytta Astanada 20 myńǵa tarta múmkindigi shekteýli azamattar bar. Olardyń 30 paıyzy jumys isteıdi. Astanada múgedekterdi aqysyz tasıtyn 14 ınvotaksı jumys isteıdi, 5-eýi kólik arbaǵa tańylǵandardy tasýǵa arnalǵan. №65 ınklıýzıvti mektep bar, onda 31 múgedek bala oqıdy. Sonymen qatar 15 stýdent medkolledjde tálim alyp júr, olardy da tańerteń aparyp, tústen keıin qaıta alyp ketetin - ınvotaksıler. Bıýdjetten tólenetin ınvotaksılerdiń arqasynda kóptegen múgedekter belsendi ómir súre alatyn boldy. 1 sáýirden bastap mektepke qosymsha 45 bala oqýǵa túsedi. Osyǵan baılanysty biz ınvotaksılerdiń sanyn kóbeıtpekpiz», - deıdi ol.
Jalpy memleketik tapsyrys aıasynda júzege asyrylǵan áleýmettik jobalarǵa 2014 jyly 435 mln. teńge qarajat bólingen.
Búgin áleýmettik jobalardyń kezekti tolqynyn iske asyrý maqsatynda basqarma birqatar belsendi úkimettik emes uıymdarmen memorandýmǵa otyrdy.
«Biz qaladaǵy ÚEU-men birge múmkindigi shekteýli jandardy jumysqa ornalastyrýdy qolǵa alyp kelemiz. Byltyr 2014 jyly «Jumyspen qamtý» baǵdarlamasy aıasynda 172 múgedek jumysqa ornalasty. 2015 jyly biz aldymyzǵa bul kórsetkishti eki esege deıin joǵarylatamyz degen maqsat qoıyp otyrmyz. Búgingi memorandýmǵa qol qoıǵan ÚEU árqaısysy 4-5 januıadan patronattyq qaraýǵa alady. Memlekettik tapsyrys aıasynda olarǵa sol úshin bıýdjetten aqsha qarastyrylǵan. Kedeıshiliktiń ar jaǵynda qalǵan múgedek jandarǵa olar zańnamalyq turǵyda kómek berip, keńes ótkizedi, jumysqa ornalastyryp, kıimi men tamaǵyn satyp alady, jumys izdestiredi, eń bastysy - óz ómirlerin ózderi jasaı alatyn deńgeıge deıin kóteredi. Kedeıshilikte turyp jatqandardyń sany qysqarady. Negizinen úkimettik organdarǵa jáne iri ulttyq kompanııalarǵa jumysqa ornalasýda», - dep atap ótti L.Ábýeva.
Onyń sózine qaraǵanda, búginde Astanada múgedekterdiń ómir sapasyn arttyrýǵa úles qosyp júrgen 34 uıym bar.
