Astanada múgedekter kúnine oraı birqatar is-sharalar ótedi
ASTANA. QazAqparat - Jyl saıyn qazan aıynyń ekinshi jeksenbisinde elimizde múgedekter kúni atalyp ótedi. Astanada bul kúnderi elordada turatyn múmkindigi shekteýli jandarǵa arnalǵan birqatar sharalar uıymdastyrylady, dep habarlady astana.gov.kz.
Atap aıtqanda, 9 qazanda Jumyspen qamtý ortalyǵynda múgedekterge arnalǵan bos oryndar jármeńkesi uıymdastyrylyp, is-shara aıasynda memlekettik organdar men úkimettik emes uıymdar olarǵa jumysqa ornalasýǵa kómektesedi. Sondaı-aq, Astana qalasynyń «Múgedek balalar qoǵamy» qoǵamdyq birlestiginiń uıymdastyrýymen «Jastar» saraıy aldyndaǵy alańda múmkindigi shekteýli balalarǵa arnalǵan kostıýmdi «kúzgi bal» ótedi. Osy kúni №7 qalalyq emhanada Múmkindigi shekteýli balalarǵa arnalǵan «Jaqsylyq pen úmittiń túsi» atty shyǵarmashylyq sýret salý is-sharasy ótkiziledi.
Sondaı-aq, 10 qazanda elorda emhanalarynda Ashyq esik kúnderi uıymdastyrylady. Astana qalasynyń «Múgedek balalar qoǵamy» qoǵamdyq birlestigi uıymdastyrýymen 12 qazanda múgedek balalar «Han shatyr» SOO attraktsıonyna barýǵa múmkindik alady.
13 qazanda №65 ınklıýzıvti jalpy orta bilim beretin mektep-gımnazııasynda «Álem balalardyń kózimen» atty balalar shyǵarmashylyǵynyń kórmesi, orta jáne joǵary býyn oqýshylar úshin spartakıada ótedi. Túzetý jáne ınklıýzıvti synyp oqýshylary úshin oıyn-saýyq, kontserttik baǵdarlamalar usynylady.
16 qazanda №7 mektep-gımnazııasynda «Sportlandııaǵa saıahat» atty sporttyq is-shara uıymdastyrylady. Sondaı-aq, QSQQB jáne «Qaısar» sport klýbymen birge uıymdastyrǵan shahmattan ashyq jarys ótedi.
Aıta keteıik, elordada 15 myńǵa jýyq múmkindigi shekteýli janǵa jergilikti bıýdjetten 5 myń teńge kóleminde bir rettik materıaldyq kómek tólenedi.
