Astanada múgedekter arasynda úzdik bıshi men úzdik oryndaýshy anyqtaldy
ASTANA. QazAqparat - Elordadaǵy «Jastar» saraıynda múmkindigi shekteýli jandar arasynda ótken «Bárimiz birdeımiz, kemsitýshilikti bilmeımiz» atty baıqaý óz máresine jetti.
Qalalyq ákimdik pen «Dos» táýelsiz ómir» jáne «Múgedek balalar qoǵamy» qoǵamdyq birlestiginiń jaýapty qyzmetkerlerinen qurylǵan tóralqa jeńimpazdar men júldegerlerdiń esimderin atap, olarǵa dıplomdar berýmen qatar baǵaly syılyqtar da tartý etti.
Máselen, 39 jastaǵy Saıat Qurǵambekov qalalyq qarttar men múgedekter ınternatynda aıaq kıim sheberi bolyp jumys isteıdi. Jubaıy Elıtamen eki balany tárbıelep otyrǵan ol qoly bos kezinde balyq aýlap, áýen tyńdaýdy jáne balalarymen qydyrýdy jany súıedi. Bul baıqaýda alǵash ret baq synap otyrǵan Saıat «Birligi jarasqan otbasy» atalymynda turmystyq tehnıkaǵa ıe boldy.
«Bizdiń Prezıdentimiz Nursultan Nazarbaev aıtqandaı, barlyǵy da otbasynan bastalady. Biz, múgedekter múmkinshiligi shekteýli emes, shekteýsiz adamdarmyz. Sondyqtan da taǵdyr bizge qataldyq tanytsa da, oǵan moıymaı alǵa umtylýymyz qajet», - dedi S.Qurǵambaev.
Balalar úıinde ósken S.Qurǵambaev búginde eki balasyna barynsha qamqor bolyp, olardyń bilim alýyna, Qazaqstannyń otanshyl ári naǵyz ultjandy azamaty bolyp ósýine bar kúsh jigerin jumsaýdy aldyna maqsat tutyp otyr.
Sonymen, «Úzdik sheber», «Birligi jarasqan otbasy», «Úzdik bıshi», «Úzdik oryndaýshy» atalymdaryndaǵy júlderi oryndar úshin 53 adam baq synady.
Saıys qorytyndysynda «Birligi jarasqan otbasy» atalymynda Mamyr Temirlan otbasy birinshi oryndy ıelendi. Al ekinshi oryndy Qurǵambekovter ıelense, júldeli úshinshi oryndy R.Nızamýtdınov pen B. Ámirjanovanyń otbasy bólisti.
6 men 14 jas aralyǵyndaǵy topta «Úzdik bı» atalymynda «Shyǵys» toby jeńiske jetti. Al qalǵan júldeli oryndar sáıkesinshe, «Bóbek» men «Tulpar» bı toptaryna buıyrdy.
Al, 14 pen 29 jas aralyǵynda «Samǵaý» tobynyń óneri tóreshiler tarabynyń qoldaýyna pe boldy. Ekinshi oryn «Naz», al úshinshi oryn «Gúlder» bı toby men Qarlyǵash Tynabekovaǵa berildi.
14 pen 29 jas aralyǵyndaǵy «Úzdik oryndaýshy» atalymynda bas júlde Dýbek Ondırkanǵa, al qalǵan júldeli oryndar Ivan Noga men Gúljaına Erǵalıǵa buıyrdy.
Dál osy atalymnyń 29 ben 45 jas aralyǵyndaǵy atalymynda birinshi oryn Asyl Qoqanovaǵa, ekinshi, úshinshi oryndar Janar Ádilbekova men Amanjol Zakırınge berildi.
6 men 14 jas aralyǵyndaǵy «Úzdik sheber» atalymynda Elshat Jańabergenov, Elızaveta Danılova, Medet Serikbaevtar jeńimpaz atandy.
Dál osy atalymda 14 pen 29 jas aralyǵynda ótken saıysta Altynshash Muqataeva jeńimpaz atansa, qalǵan júldeli oryndar Darıǵa Qyınabaeva men Rýslan ıAmaletdınovke buıyrdy.
29 ben 45 jas aralyǵyndaǵy baıqaýda Aıgúl Shegetaeva bas júldeni ıelense, qalǵan júldeli oryndar Olesıa Poıgına men Álııa Jubatqanovaǵa berildi.
Aıta keterligi, 13 maýsym kúni saǵat 15.00-de «Jastar» saraıynda «Bárimiz birdeımiz, kemsitýdi bilmeımiz» atty qalalyq baıqaý jeńimpazdaryn marapattaý sharasy ótedi.
