Astanada múgedek balalarǵa qarjylaı kómek kórsetýge arnalǵan «Kowabunga party» qaıyrymdylyq keshi ótti

Gavaılyq taqyryptaǵy kesh «Rıksos» qonaq úıiniń ashyq aspan astyndaǵy jazǵy meıramhanasynda ótti. Qonaqtar aldyn ala satyp alynǵan shaqyrý bıletteri arqyly kirgizildi.

Qaıyrymdylyq aktsııany qazaqstannyń birqatar juldyzdary jáne bı ujymdary qoldady. Óz kezeginde jastaıynan múgedek, biraq talapty da talantty jastar - Erbol Eskenov, Masha Makarova, Dana Jaksına jáne taǵy basqalar kelýshilerge óz ónerlerin pash etti.

Án men bıge toly kesh barysynda sondaı-aq utys oıyndary oınatyldy, baıqaýlar ótkizilip, Marjan Ábilmajınovanyń sýreti aýktsıon arqyly satyldy. Qonaqtar estelikke kórme-jármeńkege qoıylǵan múmkindikteri shekteýli balalardyń qolymen jasalǵan buıymdardy satyp ala aldy.

«Astana qalasynyń múgedek balalar qoǵamy» QB-nyń dırektory Qamqa Jasanovanyń aıtýynsha, Qazaqstandaǵy BG Energy kompanııasynyń osy syndy qaıyrymdylyq sharalarynyń arqasynda sońǵy eki jylda 4 mln.-ǵa jýyq teńge qarajat jınaldy. Aldyńǵy jyly djınsy keshi bolsa, byltyr «Shaherızada» shyǵys keshi túrinde ótti. Al bıyl qaıyrymdy azamattar Gavaı úlgisindegi is-sharaǵa qatysyp, sol arqyly zárý jandarǵa qarajat jınap berdi. Qoǵamdyq birlestik túsken qarajatqa balalarǵa shaǵyn avtobýs alyp berip, sanatorıılerge saýyǵýǵa attandyrdy. «Bıylǵy jyly túsken soma da osynda ıgi isterge jumsalatyn bolady», - deıdi ol.

Uıymdastyrýshylardyń aıtýynsha, Qazaqstandaǵy BG Energy kompanııasynyń qaıyrymdylyq sharalary arqyly sońǵy bes jylda Ulttyq paralımpıadalyq komıteti men Astana qalasynyń Múgedek balalar qory úshin 400 myńnan astam AQSh dollary jınaldy.