Astanada mýaıtaıdan sheberler arasynda QR Prezıdentiniń Kýbogy úshin halyqaralyq týrnır ótedi
ASTANA. 1 sáýir. QazAqparat /Gúlmıra Álıakparova/ - Ústimizdegi sáýir aıynyń 3-i kúni Astanada mýaıtaı boıynsha sheberler arasynda Qazaqstan Respýblıkasy Prezıdentiniń Kýbogy úshin halyqaralyq týrnır ótedi. Bul týraly QR Týrızm jáne sport mınıstrligi Sport komıtetinen habarlady.
Mýaıtaıdan Qazaqstan Prezıdentiniń Kýbogy úshin alǵashqy jarystar 1993 jyly ótti jáne ol «Elýhan» kásibı sport klýbynyń júldesi úshin Dástúrli halyqaralyq týrnır dep ataldy. 1992 jyly qurylǵan «Elýhan» KSK búgingi kúni QR Mýaıtaı federatsııasynyń negizgi jattyǵý bazasy bolyp tabylady.
1995 jyly Týrnırdi Memleket basshysy arnaıy kelip tamashalady. 1998 jyldan bastap Týrnır mýaıtaı boıynsha «QR Prezıdentiniń Kýbogy» dep atala bastady jáne ol jyl saıyn Naýryz meıramy kezinde ótkiziledi. 2007 jyly Astanada Qazaqstan, Ózbekstan, Anglııa, Shotlandııa, Frantsııa, Shveıtsarııa, Gonkong jáne Taıland sportshylarynyń qatysýymen alǵashqy kásibı týrnır ótti. Onyń barysynda Álem, Azııa jáne Eýropa chempıondarynyń tıtýly men Interkontınentaldyq beldigi sarapqa salyndy.
QR Mýaıtaı federatsııasy kásibı sheberlerdiń arasyndaǵy bıylǵy kezekti týrnırin el prezıdenttigine úmitker N.Nazarbaevtyń kandıdatýrasyn qoldaýǵa arnamaq.
Týrnır barysynda sondaı-aq, Taıland Koroliniń Kýbogy úshin baq talastyratyn sportshylar arasynda kvalıfıkatsııalyq irikteý ótedi. Onyń aqtyq saıysy 2011 jyldyń 5 jeltoqsanynda Bangkokta Taıland Koroliniń týǵan kúnine oraı ótedi.
