Astanada Mońǵolııa Ulttyq akademııalyq úlken óner teatrynyń kontserti ótti
ASTANA. KAZINFORM — Mońǵolııa Prezıdenti Ýhnaagıın Húrelsúhtiń Qazaqstanǵa jasaǵan memlekettik sapary aıasynda QR Premer-mınıstriniń orynbasary — Mádenıet jáne aqparat mınıstri Aıda Balaeva Mońǵolııanyń Mádenıet, sport, týrızm jáne jastar isteri mınıstri Aldarjavhlan Jýkovynmen kezdesti.
Mádenıet jáne aqparat mınıstrligi baspasóz qyzmetiniń aqparatyna sáıkes, áriptesin iltıpatpen qarsy alǵan Aıda Balaeva Mońǵolııa Memleket basshysynyń sapary ekijaqty yntymaqtastyqty keńeıtýdegi mańyzdy kezeń bolatynyna senim bildirdi. Osy oraıda Premer-mınıstrdiń orynbasary arhıv isi, mádenıet, ádebıet jáne kreatıvti ındýstrııalar baǵyttaryndaǵy ózara yqpaldastyqty damytýdyń mańyzyn erekshe atap ótti.
Sonymen qatar Mońǵolııa arhıv qorlaryn qazaqstandyq ǵalymdardyń qatysýymen birlesip zerdeleý, sýretshilerdiń ózara kórmelerin uıymdastyrý, ádebı baılanystardy keńeıtý, sondaı-aq birlesken shyǵarmashylyq jobalardy júzege asyrý máselelerine aıryqsha nazar aýdaryldy.
Budan bólek, Úkimet basshysynyń orynbasary Mońǵolııa mınıstrin 19-20 mamyr kúnderi Astanada ótetin «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty halyqaralyq sımpozıýmǵa qatysýǵa shaqyrdy.
Óz kezeginde Aldarjavhlan Jýkovyn da seriktestikti odan ári nyǵaıtýǵa jáne barlyq negizgi baǵyt boıynsha yntymaqtastyqty keńeıtýge ózara múddelilik bar ekenin rastady.
Sondaı-aq, Qalıbek Qýanyshbaev atyndaǵy Qazaq ulttyq mýzykalyq-drama teatrynyń sahnasynda Mońǵolııa Ulttyq akademııalyq úlken óner teatrynyń «Mońǵolııanyń ásem otany» atty kontserti ótti.
Іs-shara Mońǵolııa Prezıdentiniń memlekettik sapary aıasynda uıymdastyryldy. Kontserttiń ashylýynda sóz sóılegen Aıda Balaeva Qazaqstan men Mońǵolııa arasyndaǵy mádenı-gýmanıtarlyq baılanystar jańa mazmunmen tolyǵyp, aýqymy arta túskenin atap ótti.
— Mádenı murany saqtaý jáne nasıhattaý baǵytynda da naqty nátıjeler bar. «Arhıv — 2025» jospary aıasynda Mońǵolııadan Qazaqstanǵa júzge jýyq fotoqujat pen kınofılmniń kóshirmesi jetkizilip, ortaq tarıhymyzdy tereńirek tanýǵa múmkindik berdi. Kitap jáne ádebı baılanystar da erekshe qarqyn alyp otyr. Ótken jyly Mońǵolııanyń kórnekti qalamgeriniń «Lamalardyń qandy qyrǵyny» atty tarıhı romany 3 myń danada qazaq tilinde jaryq kórip, el kitaphanalaryna jol tartty, — dedi Aıda Balaeva.
Óz kezeginde Mońǵolııanyń Mádenıet, sport, týrızm jáne jastar isteri mınıstri kontsertti uıymdastyrǵany úshin qazaqstandyq tarapqa shynaıy rızashylyǵyn bildirip, bul mádenı is-sharanyń eki el arasyndaǵy dostyq pen mádenı baılanysty nyǵaıtýǵa yqpal etetinin aıtty.
— 2024 jyly eki mınıstrlik yntymaqtastyq týraly birlesken málimdeme jasap, mádenıet pen óner salasyndaǵy yntymaqtastyq odan ári keńeıip, damyp kele jatqanyn qýana atap ótemin. Búgingi kontserttik baǵdarlamada ıÝNESKO-nyń Adamzattyń materıaldyq emes muralarynyń ókildik tizimine engen mońǵol halqynyń ulttyq ónerleri — morın hýýr men kómeı áni sııaqty óner túrlerin nazarlaryńyzǵa usynamyz, — dedi Aldarjavhlan Jýkovyn.
Kontsert baǵdarlamasynda mońǵol óneriniń tańdaýly týyndylary usynyldy. Sonymen qatar is-shara aıasynda Mońǵolııanyń dástúrli turmysy men kóshpeli mádenıetine arnalǵan kórme, sondaı-aq Shyńǵys han, Joshy han jáne Súbedeıdiń portretteri qoıylǵan kórkem ekspozıtsııa uıymdastyryldy. Kesh sońynda ártisterge Qazaqstan men Mońǵolııa prezıdentteriniń atynan yqylas gúlderi tabystaldy.
Osydan buryn Qazaqstan men Mońǵolııa prezıdentteri shaǵyn quramda kelissóz júrgizip, 13 qujatqa qol qoıǵanyn jazdyq.
