Astanada MMA-dan Qazaqstan chempıonaty bastaldy
ASTANA. QazAqparat - 8 mamyrda Astanada MMA-dan el chempıony ataǵyn alý úshin barlyq óńirlerden 200 sportshy jınaldy, dep habarlaıdy QazAqparat Qazaqstan MMA federatsııasynyń baspasóz qyzmetine silteme jasap.
Jekpe-jek bes áıelder men toǵyz erler salmaq sanattary boıynsha ótip jatyr. Qazaqstan chempıonatyna alǵash ret 16-17 jas aralyǵyndaǵy jasóspirimder qatysýda. Bul joly jasóspirimder dárejesinen 40 sportshy baq synaýǵa nıet bildirgen.
Atap aıtqanda, báseke 8-11 mamyr aralyǵynda elordadaǵy «Qazaqstan» sport saraıynda ótedi.
Jarystyń alǵashqy kúni jasóspirimderdiń kúsh synaýynan bastaldy. MMA federatsııasynyń birinshi vıtse-prezıdenti Asylbek Dúısenovtyń aıtýynsha, jasóspirimder dárejesindegi sportshylardyń deńgeıi jaqsy.
«Búgin el chempıonatynda alǵash ret jasóspirimder qatysyp jatyr. Olar jasyna qaramastan, jaqsy jekpe-jek kórsetýde. Kóptegen aıqastar merziminen buryn bitip jatyr. Jarystyń alǵashqy kúninde-aq olardyń áleýetiniń joǵary ekendigin kórip otyrmyz», - dedi ol.
MMA-dan VI Qazaqstan chempıonatynyń aqtyq saıystary QAZSPORT telearnasynan tikeleı efırden kórsetiledi.
