Astanada MMA aptalyǵy ótedi
ASTANA. QazAqparat - Mamyr aıynda Astanada «MMA aptalyǵy» sporttyq sharasy aıasynda MMA aralas jekpe-jeginen Qazaqstannyń VI chempıonaty ótedi. Bul týraly Qazaqstan MMA federatsııasynyń baspasóz qyzmeti málim etti, dep habarlaıdy QazAqparat.
8-11 mamyr aralyǵynda el aýmaǵynan jınalǵan kil myqty sportshylar Qazaqstan chempıony ataǵy úshin baq synasady. Jarystar 14 salmaq dárejesinde erler men áıelder arasynda ótedi.
«Qazaqstan álemdik áýesqoı MMA-da bes jyl qatarynan kóshbasshy orynda keledi. Al bıyl Qazaqstannyń VI chempıonatynda alǵash ret jasóspirimder qatysqaly jatyr. Osy oraıda MMA boıynsha Qazaqstannyń ulttyq quramasynyń qazirgi músheleriniń sońynan laıyqty izbasarlary erip kele jatqany qýantady. Biz jasóspirimder arasynda da halyqaralyq arenada joǵary oryndardan kórinýge nıettimiz», - dedi Qazaqstan MMA federatsııasynyń birinshi vıtse-prezıdenti Asylbek Dúısenov.
11 mamyrda MMA-dan QR chempıonatynyń fınaly ótedi, onda áýesqoılar arasynda úzdikter anyqtalady.
