Astanada mıtıng uıymdastyrǵan Marat Ábıev 15 táýlikke qamaýǵa alyndy
Resmı habarlamada aıtylǵandaı, 2022 jylǵy 27 qarashada elordanyń mamandandyrylǵan aýdanaralyq soty M. Ábıevke qatysty ákimshilik quqyq buzýshylyq týraly eki isti qarady.
Polıtsııa organy M. Ábıevke qatysty ákimshilik quqyq buzýshylyq týraly eki hattama toltyrǵan:
- Qazaqstan Respýblıkasynyń beıbit jınalystardy uıymdastyrý jáne ótkizý tártibi týraly zańnamasynda belgilengen tártipti buza otyryp, ruqsat etilmegen mıtıngini uıymdastyryp, ótkizgeni úshin (ÁQBtK 488-babynyń 7-bóligi);
- Polıtsııa qyzmetkerleri óz mindetin atqarý barysynda olardyń zańdy talaptaryna baǵynbaǵany úshin (ÁQBtK 667-babynyń 1-bóligi).
«Іs materıaldaryna sáıkes, 2022 jylǵy 26 qarashada M. Ábıev Astana qalasynyń jergilikti atqarýshy organynyń ruqsatyn almaı, Qorǵaljyn tasjoly boıynda mıtıng uıymdastyryp, polıtsııa qyzmetkerleriniń zańdy talaptaryna baǵynbaǵan. M.Ábıev sotta málim etkendeı, aýyl sharýashylyǵyn damytý jobasyn erterek qaraýǵa el basshylyǵynyń nazaryn aýdarý maqsatynda beıbit mıtıng uıymdastyrǵan. Sondaı-aq ol beıbit jınalysqa deıin eshqandaı zańǵa qaıshy áreket jasamaǵanyn jáne mıtıng ótkizý týraly bir kún buryn qala ákimine habarlaǵanyn aıtty», - delingen habarlamada.
Sonymen qatar sottyń aqparatynda M. Ábıev ákimshilik quqyq buzýshylyq boıynsha kinásin moıyndamaǵany aıtylǵan.
«Prokýror sottan ony kináli dep tanýdy jáne 15 táýlikke qamaýǵa alýdy surady. Qazaqstan Respýblıkasy zańnamasynyń normalaryna sáıkes pıketteý, jınalys, mıtıng formasynda beıbit jınalystar ótkizý týraly habarlamany uıymdastyrýshy jergilikti atqarýshy organǵa ol ótkiziletin kúnge deıin 5 jumys kúninen keshiktirilmeıtin merzimde jetkizýi kerek», - dep habarlaıdy qalalyq sot.
Birinshi fakti boıynsha, M.Ábıev jergilikti atqarýshy organǵa habarlama bermegeni anyqtaldy. Osylaısha, ol beıbit jınalystardy uıymdastyrý men ótkizýdiń belgilengen tártibin buzǵan bolyp tanylady.
Ekinshi fakti boıynsha, M.Ábıev polıtsııa qyzmetkerleriniń tártipti saqtaý týraly birneshe ret jasaǵan úndeýin elemeı, ruqsat etilmegen sherýge qatysýdy toqtatýdan bas tartqany vıdeojazbadan kórinedi.
Sotta M.Ábıevtiń kinási faktileı dáleldermen, ákimshilik quqyqbuzýshylyq týraly hattamanyń naqty málimetteri, vıdeojazba jáne basqa da materıaldarmen dáleldendi.
ÁQBtK-niń 488-baby 7-bóliginiń sanktsııasy aıyptyǵa 15 AEK kóleminde aıyppul salý nemese 15 táýlikke deıin qamaýǵa alýdy qarastyrady.
ÁQBtK 667-babynyń 1-bóliginiń sanktsııasymen 30 AEK kóleminde aıyppul salý nemese 15 táýlikke deıin qamaýǵa alý kózdeledi.
«Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty M.J. Ábıevti joǵaryda atalǵan quqyq buzýshylyqtardy jasaǵany úshin kináli dep tanydy jáne eki quqyq buzýshylyq boıynsha da úkim shyǵaryp, 15 táýlikke qamaýǵa alý jazasyn belgiledi», - delingen sottyń resmı habarlamasynda.
Qaýlylar zańdy kúshine engen joq.
Eske salaıyq, 26 qarashada Astanada mıtıng ótti. Oǵan qatysty qalalyq Polıtsııa departamenti málimet taratty.
Anyqtalǵandaı, osy kúni keshkisin qaladaǵy túngi klýbtardyń birinde jastarǵa arnalǵan mádenı-buqaralyq is-shara uıymdastyrylǵan. Uıymdastyrýshy kásipker sharaǵa 300-ge jýyq jasty jınaǵan.
«Onyń barysynda uıymdastyrýshy jınalǵandarǵa kórineý jalǵan aqparat berip, beıbit jınalystar ótkizýdiń zańda belgilengen tártibin buza otyryp, olardy zańsyz sherýge shaqyrǵan. Arandatý saldarynan qoǵamdyq tártip óreskel buzylyp, kólik jáne áleýmettik ınfraqurylymnyń tolyqqandy jumys isteýine kedergi keltirildi», - delingen polıtsııa habarlamasynda.