Astanada mıtıng ótetin alańdarǵa beınebaqylaý kamerasy qoıyldy

NUR-SULTAN. QazAqparat – Nur-Sultan qalasynda mıtıng ótetin qoǵamdyq oryndarǵa beınebaqylaý kamerasy qoıyldy. Bul týraly Nur-Sultan qalasynyń tsıfrlandyrý jáne memlekettik qyzmet basqarmasynyń basshysy Botagóz Qasabek aıtty, dep habarlaıdy QazAqparat tilshisi.

«Ótken jyly kúsh qurylymdarynyń shuǵyl tapsyrysyna sáıkes, qala aýmaǵynda iri mıtıngter ótetin qoǵamdyq oryndarǵa 500 beınebaqylaý kamerasy qoıyldy. Qala boıynsha beınebaqylaý kamerasyn ornatý jumysy odan ári jalǵasady. Qazir Almaty jáne Baıqońyr aýdandary boıynsha qaı jerlerge kamera ornatý kerektigi anyqtaldy. Saryarqa aýdanyna kelsek, búginde tehnıkalyq tekserý júrip jatyr. Sodan soń Esil aýdanyna kirisemiz», - dedi Botagóz Qasabek qalalyq máslıhattyń otyrysynda.

Onyń aıtýynsha, beınebaqylaý kameralaryn ornatý jumysy aýdandyq ákimdikter jáne polıtsııa departamentimen keńesip júrgiziledi.

«Taǵy bir ózgeris - buǵan deıin qala kartasynda qaı jerde beınebaqylaý kamerasynyń ornatylǵany kórsetiletin. Endigi ýaqytta beınebaqylaý kamerasy bar degen belgini kartada kórsetýge tyıym salyndy. Bul lańkestikke qarsy áreketterdiń aldyn alý maqsatynda engizilip otyr», - deıdi ol.

Buǵan deıin basqarma basshysy elordada «Sergek» kameralarynyń artatynyn aıtqan edi.

Odan bólek, Nur-Sultanda tsıfrlandyrýdyń jańa baǵdarlamasy ázirlenip jatqany belgili boldy.