Astanada myńǵa jýyq ulan alaıaqtyqtan qorǵaný tásilderin meńgerdi
ASTANA. KAZINFORM — Astana qalasy boıynsha Ekonomıkalyq tergep-tekserý departamentiniń qyzmetkerleri QR ІІM Ulttyq ulanynyń áskerı qyzmetshileri men qyzmetkerleri úshin qarjylyq saýattylyqty arttyrýǵa baǵyttalǵan aýqymdy kezdesý ótkizdi, dep habarlaıdy qala ákimdiginiń resmı saıty.
800-den astam qatysýshyny qamtyǵan is-shara «Zań men Tártip» respýblıkalyq qaǵıdatyn iske asyrý aıasynda uıymdastyrylyp, ekonomıkalyq quqyqbuzýshylyqtardyń júıeli profılaktıkasyna baǵyttaldy.
Kezdesýdiń negizgi maqsaty — áskerı ujymdardaǵy quqyqtyq tártipti nyǵaıtý, jeke quramdy alaıaqtyq shemalardan qorǵaý jáne áskerı qyzmetshilerdiń bedeli men ál-aýqatyna zııan keltirýi múmkin ekonomıkalyq quqyqbuzýshylyqtardyń aldyn alý.
Kezdesý barysynda departament qyzmetkerleri qarjylyq pıramıdalardyń jumys isteý tetikterin jan-jaqty túsindirip, tsıfrlyq ortadaǵy alaıaqtyqtyń jasyryn belgilerin anyqtaýdy úıretti.
Erekshe nazar «dropperler» qyzmetine qatysýdyń jol berilmeıtinine aýdaryldy: áskerı qyzmetshilerge ózderiniń bank kartalary men shottaryn kúmándi qarajatty qolma-qol aqshaǵa aınaldyrý úshin úshinshi tulǵalarǵa berý olardy aýyr qylmystarǵa sybaılas etetini jáne qatań quqyqtyq saldarǵa ákeletini eskertildi.
— Jıynda lýdomanııamen kúres máselesi de talqylandy. Spıkerler oıynǵa táýeldiliktiń moraldyq beıneni jáne qarjylyq turaqtylyqty qalaı buzatynyn, qomaqty qaryzdardyń paıda bolýyna jáne sybaılas jemqorlyq quqyqbuzýshylyqtarǵa ákeletin negizgi sebepterdiń biri ekenin túsindirdi, — delingen habarlamada.
Kezdesý sońynda departament qyzmetkerleri árbir áskerı qyzmetshiniń joǵary qarjylyq mádenıeti men tártibi el qaýipsizdiginiń negizi jáne kúshtik qurylymdar qatarynda zańdylyqty saqtaýdyń kepili ekenin atap ótti.
Osyǵan deıin jasandy ıntellektige negizdelgen kameralar Ulttyq ulan sarbazdaryn baqylap otyratyny málim boldy.
