Astanada «Mıgrant» keń aýqymdy saýyqtyrý sharasy júrip jatyr - ІІD
ASTANA. Qarashanyń 3-i. QazAqparat /Aıdar Ospanalıev/ - Keshe, ıaǵnı qarashanyń 2-si kúni Astana qalalyq Іshki ister departamentiniń qyzmetkerleri «Mıgrant» keń aýqymdy jedel-saýyqtyrý sharasyn bastady,
dep habarlaıdy QazAqparat.
Atalmysh shara elimizge shetten kelýshi azamattardyń memleketke kelý tártibin buzý áreketteriniń aldyn alý men zańsyz kóshi-qon arnalarynyń jolyn kesý bolyp tabylady. Ol qarasha aıynyń 11-ne deıin jalǵasady. Jedel-saýyqtyrý sharasynyń uıymdastyrylýyna oraı qala aımaǵyndaǵy «Shep» beketteri qosymsha kóshi-qon jáne jol polıtsııasy qyzmetkerlerimen kúsheıtilgen. Olar syrttan keletin kólikter men jolaýshylar kólikterindegi azamattardyń qujattaryn tekserý jumystarymen aınalysýda. «Operatsııa bastalǵaly tártip saqshylary 79 kólikti teksergen. Olardyń qatarynda 27 jolaýshylar tasymaldaıtyn kólik te bar. Tekserýler kezinde jolaýshylardyń 34 tártip buzý áreketi anyqtaldy. Olar ýaqytynda tirkelmegen bolyp shyqty. Sondaı-aq shara barysynda 48 túrli nysandar men oqý oryndary jáne adamdar kóp jınalatyn aımaqtar tekserildi. Nátıjesinde elimizge kelý tártibin buzǵan 206 azamat ákimshilik jaýapqa tartyldy. Sot sheshimimen olardyń 10-y elderine qaıtaryldy», dedi Astana qalalyq ishki ister departamentiniń Kóshi-qon polıtsııasy basqarmasynyń bastyǵy Qusaıyn Sandybaev.
Onyń málimetterinshe, aty-jónin anyqtaý maqsatynda 21 sheteldik arnaıy mekemelerde otyr. Elimizde ýaqytynda tirkelmegeni úshin 3 adam, al memlekette múldem tirkelmeı júrgen 77 azamat ákimshilik kodekstiń túrli baptary boıynsha jaýapqa tartylǵan. «Operatsııa kezinde biz qaladaǵy bazarlar men halyqaralyq baǵyttaǵy avtobýstar turaqtaıtyn oryndardy da tekserdik. Nátıjesinde elimizde zańsyz túrde saýdamen aınalysyp júrgen 35 sheteldiktiń elde bolý merzimi qysqartyldy», dedi basqarma bastyǵy.
