Astanada meıramhana alaıaǵy ustaldy - ІІD
ASTANA. QazAqparat - Astanada alaıaqtyq jasady degen kúdikpen er adam ustaldy, dep habarlaıdy «QazAqparat» HAA elordalyq ІІD baspasóz qyzmetine silteme jasap.
Astana men Almatyda ornalasqan meıramhana ákimshilerine qatysty jasalǵan birqatar alaıaqtyq isi ashyldy. Alaıaqtyq áreketterimen jalpy somasy eki mıllıon teńge zalal keltirgen er adam ustaldy, dep túsindirdi ІІD-de. Qazirgi tańda 15 iske qatysy bar kúdikti tergelip jatyr.
Polıtseıler anyqtaǵandaı, alaıaq telefon arqyly meıramhana basshylaryna ózderin qala ákimdiginiń nemese ulttyq kompanııalardyń ókili retinde tanystyryp, banket jasaýǵa nıetti ekendikterin bildiredi jáne qonaqtar arasynda tanymal adamdardyń bolatynyn habarlaıdy. «Tapsyrys berýshi» bankettiń tólenetinin eskertip, dastarhanǵa menıýde joq qymbat ishimdikter qoıýlaryn suraıdy.
Alaıaq meıramhana ókiline ondaı elıtaly ishimdikterdi qandaı dúkenderden alýǵa bolatynyn aıtady. Alaıda, alaıaq birneshe ýaqyttan keıin meıramhanaǵa qaıta habarlasyp, sol dúkende júrgenin aıtyp, Qiwi-ámııanǵa aqsha salyp jiberse qajetti ishimdikti ózderi ala salatynyn málimdeıdi. Restoratorlardy banket aıaqtalǵannan keıin eseptesýge kóndiredi.
Zardap shegýshiler bankettik tapsyrystan bas tartpaý úshin, qymbat ishimdikterdi alýǵa aqsha aýdarǵan. Keıin «banketke tapsyrys berýshiler» telefondaryn óshirip, izim-ǵaıyp joq bolady.
