Astanada meıramhana ákimshisi klıentterin 15 mln teńgeden astam somaǵa «laqtyryp» ketti
ASTANA. QazAqparat - Astana qalalyq ishki ister departamentine elordalyq meıramhanalardyń biriniń ákimshisiniń ústinen 20-dan astam aryz tústi, dep habarlaıdy QazAqparat.
«Qalalyqtardan Sembınov kóshesi boıyndaǵy meıramhanalardyń biriniń banket zaly ákimshisiniń ústinen 30 aryz tústi. Ol tólemaqyny aldyn ala tolyq tóleıtin bolsa, onyń kemıtindigin aıtyp klıentterin aldaǵan. Qalǵan aqshany qaltasyna basyp otyrǵan. Atalǵan fakti boıynsha QR Qylmystyq kodeksiniń 190 baby «Alaıaqtyq» boıynsha sotqa deıingi tergeý amaldary bastaldy», - dedi qalalyq ІІD baspasóz qyzmetiniń jetekshisi Sofıa Qolyshbaeva.
Onyń aıtýynsha, qazirgi ýaqytta kúdikti ustalyp, tutqynǵa alynǵan. Keltirilgen shyǵynnyń jalpy kólemi 15 mln teńgeden asyp jyǵylady.
Esterińizge sala ketsek, 4 tamyz kúni Qalı Áýbákirov Feısbýkte «Porta Fortuna» meıramhanasy týraly qoǵamdyq qyzý pikirtalas týdyrǵa jazba qaldyrǵan bolatyn. Onda ol meıramhana tarabynan aldaýǵa ushyraǵandyǵyn jazǵan edi.
«Banket ótkizýge oryn izdeý barysynda «Porta Fortuna» (Astana, Sembınov k, 11/3 úı) meıramhanasyna bardym. Kezdesýge mekemeniń ákimshisimin degen Sábıt esimdi jas jigit shyqty. (...) 2017 jyldyń 15 mamyrynda men qalǵan somanyń barlyǵyn tólep, kiris kassasy orderiniń túbirtegin aldym. (...) Munan ary ne bolǵanyn elestetýdiń ózi qıyn. Úılený toıy ótýi tıis meıramhana hollynda tolyq kólemde tólegen aqshamdy ákimshi Sábıttiń kassaǵa engizbegendigin aıtty. Sol jerde Sábıttiń is-áreketinen zardap shekkenderdiń shamamen 20 adam ekendigin habarlady. Meıramhana qyzmetkerleri men basshylyǵynyń mekeme ǵımaratynda mundaı jaıttyń oryn alyp jatqandyǵyn baıqamaı qalýy men úshin áli de túsiniksiz», - dep jazǵan edi ol.
