Astanada «Meta-Ǵalam» atty zamanaýı sýret kórmesi ashyldy
Kulanshi galereıasyna qoıylǵan bul jolǵy týyndylar da erekshe art keńistik týdyrǵandaı áser qaldyrady.
Jandy sýretterdiń úılesimin tóbeńnen tóne jyljıtyn erekshe keskinder odan beter túrlendiredi.
Kulanshi ortalyǵyna jıi bas suǵatyn óner jankúıerleri muny Leıla Mahat bastaǵan ujymnyń taǵy bir tyń súrleýine balap otyr.
«Men úshin kórmege qoıatyn týyndylardyń mazmunyn barynsha ashyp, keńistikpen úılestirip usyný óte mańyzdy. Sýret kórmesin altynshy jyl qatarynan ótkizip otyrmyz. Álemdi basqasha sezinetin adamdar bar. Sol sezimnen týǵan tolqynysty ishte kóp saqtap júre almaıdy. Ol óner týyndysy bolyp syrtqa shyǵýy kerek. Sýretshilerdi ókpeletýge tipten bolmaıdy. Tarıh bizge sony úıretti», - deıdi Leıla Mahat.
Kórmeniń atyn «Meta-Ǵalam» dep qoıypty.
«Bul kórmeni josparlaǵanymyzǵa bir jyl boldy. Birinshi ataýyn oılastyrdyq, jarty jyl buryn kórmeniń kontseptsııasyn taptyq. Montaj jumystaryna kirisken kezde Tsýkerberg te Facebook-tiń resmı ataýyn «Meta» dep ózgertip jatty. Qyzyq kezdeısoqtyq edi», - deıdi sýretshi.
Kórmeni uıymdastyrýshy «Meta-Ǵalamnyń» mánin kórmedegi sýretterden izdeý kerek ekenin aıtady.
«Ǵalymdar arasynda mýltıǵalamnyń bar-joǵy týraly daý bar. Al metaǵalam parallel álemderdi de qamtıdy. Oıdan paıda bolǵan vakkýmdar men landshaftar, energetıkalyq perneler. Munyń bári kvanttyq fızıkanyń, ǵarysh iliminiń ózegi desek, ónerdiń qandaı qatysy bar? Ǵylym turǵysynan alsaq, bári de salystyrmaly. Al óner turǵysynan alsaq, bári op-ońaı. Sýretshi ózi oıdan qurǵan álemde ómir súre alady. Qazaqstannyń ár qalasynan kelgen jas sýretshilerdiń stıli, tehnıkasy, baǵyty, janry, minezi, qoltańbasy, ómirge degen kózqarasy bir-birine uqsamaıdy. Árkimniń júrip ótken jolyna baılanysty óz álemi bar. Ol álem estelikterden, sezimderden, úmitterden quralady. Al sýretshi eshqandaı qorǵanyshy bolmasa da, sol álemderge júregin ashyp, sonyń aýrasynda tynystaıdy, áleýmettiń energetıkalyq terbelisterin óz boıyna qabyldaıdy. Osynyń bári sýretkerdiń júregine beıne retinde shoǵyrlanyp, qylqalam arqyly keskin bolyp qaıta shyǵady», - dep túsindirdi Leıla Mahat.
Kórmege 86 keskindeme men grafıka týyndylary qoıylǵan.
Avtorlary: Almas Nurǵojaev, Ánýar Shaımergenov, Sáýlet Jánibek, Sofııa Taıder, Nurbolat Asqar, Arýaı Tasmaǵanbetova, Darhan Begdatuly, Stas Agapıtov, Aıtjamal Tastambekova.
«Áıel keıpindegi baqyt qusy»
Aıtjamal Tastambekova qylqalammen syryn jaıyp salý úshin sheberhananyń bolýy shart emes dep esepteıdi. Shabyty kelgen sátte asúıdiń buryshyn da, jatyn bólmeniń qaq ortasyn da sheberhanaǵa aınaldyra salady. Bir qyzyǵy ol sýretin kenepke de, qaǵazǵa da, aǵashqa da emes, gazet betine salady...
Kórmege «Baqyt qusy» serııasymen salynǵan týyndylaryn ákelipti.
«Áıel bir qolymen besikti, ekinshi qolymen búkil álemdi terbetedi degen keremet sóz bar. Osy týyndylarym arqyly sol qanatty sózdi keskindeme tilinde sóıletýge tyrystym», - deıdi ózi.
Shańyraq jylýy
27 jastaǵy Nurbolat Asqar – Leıla Mahattyń shákirti. Qazir ózi de balalar kórkemsýret mektebinde shákirt tárbıelep júr. Shaǵyn ǵana sheberhanasynda balalarǵa sýretshiliktiń álippesin úıretedi. Ustazdyqtan qoly qalt etkende óz sheberligin shyńdaıdy.
Búgingi kórmege onyń 18 shyǵarmasy qoıylǵan.
«Sýretshide minez bolý kerek. Qarapaıym etıýdten kúrdeli kompozıtsııaǵa deıingi jol bar. Sol joldy aınymaı júrip ótý úshin erik-jiger qajet. Ónerdi bári birdeı túsine bermeıdi, sol sebepti qoldaý da az. Qaıta meni qoldaıtyn anam, jubaıym men balalarym bar. Solardyń úmitin aqtaýǵa tyrysamyn», - deıdi sýretshi.
Instagram-nan – Kulanshi-ǵa
Stas Agapıtov sýretter3y birinshi ret kórmege usynyp otyr. Buǵan deıin tek Instagram-da jarııalap júrgen eken.
«Men abstraktsııany jaqsy kóremin. Shabytty shaqta ǵana qolyma qylqalam alatyndyǵymnan shyǵar, sýret salý kezindegi kúıimdi sózben aıtyp jetkize almaımyn. Boıaý, kenep, mýzyka. Osy úsheýi úılesim tappasa, sýret sátsiz shyqqany», - dedi sýretshi.
Taraz qalasynda sáýlet dızaıneri mamandyǵyna oqyǵan Stas Agapıtov biraz ýaqyt sýretshilikten qol úzgen eken. Al 2019 jyly túbegeıli óner jolyna túsken.
«Ekiniń biri sýret tilin túsine bermeıdi. Áleýmettik jelige jarııalaǵan eńbekterimniń astyna «Mundaıdy meniń balam da salady» dep jazatyndar bar. Biraq qyzyǵýshylyq tanytyp, satyp alatyndar da bar. Instagram ınterer ónerin damytyp jatyr. Men de sol arqyly tabys kóre bastadym. Biraq naǵyz óner ıesi bolý úshin óz stılimdi damytý kerek ekenin túsindim. Búgingi kórmege qoıylǵan týyndylarymdy ózim ónerge jatqyzamyn», - deıdi ol.
