Astanada «Mereıli otbasy» ulttyq baıqaýy kezeńiniń jeńimpazdary anyqtaldy (FOTO)
ASTANA. QazAqparat - Búgin Astanada «Mereıli otbasy» ulttyq baıqaýynyń qalalyq kezeńiniń qorytyndysy shyǵarylyp, úzdik dep tanylǵan otbasylar marapattaldy, dep habarlaıdy astana.kz.
«Mereıli otbasy» ulttyq baıqaýynyń sharttaryna sáıkes baıqaýǵa qujat qabyldaý aǵymdaǵy jyldyń sáýir aıynda bastalǵan bolatyn. Berilgen ýaqyt aralyǵynda elorda ákimdigine 51 otbasydan ótinish kelip túsken. - «Mereıli otbasy» - bul Prezıdentimizdiń otbasylyq qundylyqtardy nasıhattaýǵa arnalǵan ıdeıasy. Elbasy memleket saıasatynyń basty baǵyttarynyń biri retinde otbasy saıasatyn atap ótken bolatyn. Bul bizdiń qoǵamnyń basty qundylyqtarynyń biri, - dedi QR Prezıdenti janyndaǵy otbasy saıasaty jáne áıelder isi jónindegi ulttyq komıssııanyń hatshysy Sholpan Syzdyqova. Baıqaý qorytyndysy boıynsha Dúısekbaevtar men Vrýblevkııler otbasylary júldeli 3-shi oryndy ózara bólisti. Al 2-shi oryn Gerasımenko jáne Ókenovter otbasylaryna buıyrdy. Júginisovter men Eleýsinovter otbasylary «Mereıli otbasy» ulttyq baıqaýynyń jeńimpazdary atandy.
