Astanada «Mereıli otbasy» konkýrsynyń qalalyq kezeń jeńimpazdary anyqtaldy

ASTANA. QazAqparat - Elordada Beıbitshilik jáne Kelisim saraıynda «Mereıli otbasy» ulttyq konkýrsynyń qalalyq kezeńiniń jeńimpazdaryn marapattaý saltanaty ótti, dep habarlady qalalyq ákimdiktiń baspasóz qyzmetinen. Qobylbaevtar men Salyqovtar áýleti birinshi oryndy ózara bólisti.

Sharanyń ashylýynda ótken jylǵy baıqaý jeńimpazdary Júginisovtar otbasy mýzykalyq tartý jasady. Qazaqstandyq estrada juldyzdary Marjan Arapbaeva, Dos, Erbolat Tólegenov («Ázil álemi») jáne t.b. astanalyqtarǵa keremet kóńil kúı syılady.
Elordalyq úzdik otbasylardy Astana qalasy ákiminiń orynbasary Ermek Amanshaev marapattady.
Konkýrs jeńimpazdarynyń biri ártisterdiń otbasy Salyqovtar mýzykalyq sálem joldady.
11 bala tárbıelep otyrǵan erli-zaıypty Qobylbaevtar kelýshilerdi óz otbasylarynyń kóp ulttylyǵymen jáne birtutastyǵymen tánti etti.
- Jubaıymyz ekeýimiz úılengende otbasymyz úlken bolady dep birden kelistik. Taǵdyrdyń jazǵanymen, 9 jyl bala súıe almadyq. Tuńǵyshymyz dúnıege kelgen jyly Balalar úıinen tórt balany asyrap aldyq, keıinnen taǵy úsheýin aldyq, qazirgi kezde bizdiń 11 balamyz bar, onyń ishinde, orys ta, qazaq ta, ýkraın da, túrik te bar, - deıdi otaǵasy Murat Qobylbaev.
Qobylbaevtar áýleti otbasylyq bı ansamblin qurǵan, sonyń arqasynda balalar túrli ulttardyń bıin de, tilin de meńgeredi. Balalardyń bári de qazaq jáne orys tilderinde erkin sóıleıdi.
«Mereıli otbasy» ulttyq konkýrsynyń qalalyq kezeńiniń jeńimpazdary endi respýblıkalyq baıqaýǵa daıyndalady.