Astanada «Mereıli otbasy» baıqaýyna ótinishter qabyldaý bastaldy
ASTANA. QazAqparat - Elordada «Mereıli otbasy» ulttyq baıqaýyna qatysýǵa ótinishter qabyldaý bastaldy. Bul týraly Esil aýdany ákiminiń apparatynan habarlady, dep jazady elorda ákimdiginiń resmı saıtynda.
Atalmysh baıqaý ónegeli qundylyqtardy jańǵyrtýǵa jáne otbasy men nekeniń jaǵymdy úlgisin taratýǵa, otbasy mártebesin arttyrýǵa baǵyttalǵan. Baıqaýǵa eńbekte, sportta, sondaı-aq shyǵarmashylyq, zııatkerlik, ǵylymı jetistikterge qol jetkizgen otbasylardyń músheleri qatysa alady. Sharany ótkizýdiń maqsaty - otbasy, adamgershilik, rýhanı ınstıtýtty nyǵaıtý, erli-zaıyptylardyń jaýapkershiliginiń mańyzdylyǵyn kórsetý, bala tárbıesindegi ata-ananyń jaýapkershiligin arttyrý, otbasylyq qundylyqtardy, kámeletke tolǵan balalardyń eńbekke qabiletsiz jáne qart ata-analaryna qamqorlyǵyn keńinen nasıhattaý, sondaı-aq, qazaqstandyq otbasynyń jaǵymdy ımıdjin qalyptastyrý bolyp tabylady. Baıqaý úsh kezeńmen ótkiziledi, onyń birinshisi - aýdandyq (qalalyq), ekinshisi - óńirlik, úshinshisi - ulttyq sıpatta bolmaq. Aıta keteıik, baıqaýdyń ótkizilý qaǵıdalarymen Astana qalasy Esil aýdany ákimi apparatynyń resmı ınternet resýrsynda tanysýǵa bolady. Baıqaýǵa qatysýǵa nıet bildirgenderdiń qujattary 2014 jyldyń 17 sáýirine deıin Astana qalasy Qabanbaı batyr dańǵyly 33 úı, 307 kabınet mekenjaıy boıynsha qabyldanady.
