Astanada merekelik sharalar ótip jatyr
ASTANA. QazAqparat - Búgin elordada Otan qorǵaýshy kúnine oraı mádenı sharalar ashyq alańdarda, kontsert zaldarynda ótip jatyr, dep habarlaıdy QazAqparat.
Atap aıtqanda, ákimdiktiń aldyndaǵy qalalyq alańda qazaqstandyq estrada juldyzdarynyń qatysýymen ashyq aspan astynda úlken kontsert bastaldy. Merekelik shara saǵat 13:00-den saǵat 23:00-ge deıin jalǵasady. Móldir Áýelbekova, Dastan Orazbekov, Beıbit Qorǵan, Serik Ibragımov, Adam, «Art Dombyra» jáne «Melomen» toptary jáne basqa da ónerpazdar kóterińki kóńil-kúı syılaıdy.
Budan bólek, qalalyq alańda qurylǵan shatyrlarda turǵyndar nazaryna arnalǵan kórme uıymdastyryldy. Qoıylǵan áskerı eksponattarmen fotosýretke túsý úshin arnaıy oryndar jasaqtalǵan.
Sonymen qatar qala turǵyndary men qonaqtary úshin qarý-jaraqty bólshektep buzyp, qaıta jınaý boıynsha arnaıy saıys ótip jatyr. Uıymdastyrylǵan osy shara jastardyń eleýli qyzyǵýshylyǵyn týdyrdy.
Aıta keteıik, Astanadaǵy merekelik kontsertter men ózge de mádenı sharalar 8-9 mamyr kúnderi de jalǵasady. 
Qalalyq ákimdiktiń málimitenshe, 8 mamyrda «Astana» kontsert zalynda «Uly jeńis kúni» atty merekelik kontsert kópshilik nazaryna usynylady. Osy kúni ónerpazdar Ekinshi dúnıejúzilik soǵys ardagerlerine arnap soǵys jyldaryndaǵy ánderdi oryndaıdy. Sondaı-aq, kontsertke elordalyq «Jastar» teatrynyń ártisteri qatysady.
9 mamyrda «Otan qorǵaýshylar» monýmentine «Dańq gúltizbegin» qoıý saltanaty ótedi. Sodan keıin Stýdenttik saıabaqta 11 áskerı palatadan qurylǵan qalashyqta ardagerler men tyl eńbekkerlerine arnap merekelik dastarhan jaıylady. Jeńis kúnin merekeleý Stýdenttik saıabaqta jáne qalalyq alańda jalǵasady. Belgili qazaqstandyq estrada ánshileri soǵys jyldaryndaǵy ánderdi oryndaıdy.
