Astanada merekelik sharalar kezinde joldardaǵy qozǵalys shekteledi
ASTANA. QazAqparat - Astana qalasynda Qazaqstan halyqtary birligi - 1-Mamyr, Otan qorǵaýshylar kúni - 7 mamyr merekelerine arnalǵan saltanatty is-sharalar ótkizilý kezeńinde, qaladaǵy kólik quraldarynyń qozǵalysyna shekteý qoıylady.
Bul týraly Astana qalasy ІІD Ákimshilik polıtsııa basqarmasy elorda turǵyndary men qala qonaqtarynyń qaperine salady. Bul týraly Astana qalasy ákimdiginiń baspasóz qyzmeti habarlady.
23 sáýir kúni - Táýelsizdik kóshesi boıyndaǵy «Qazaq eli» alańyna dekoratsııalar men sahnalar ornatylýyna baılanysty, Baıtursynov kóshesi ýchaskesinen Nájimedenov kóshesine deıin, ıaǵnı barlyq josparlanǵan merekelik is-sharalar aıaqtalǵansha kólik quraldarynyń qozǵalysy jabylatyn bolady.
1 mamyr kúni tańǵy saǵat 7-den bastap, merekelik is-sharalar aıaqtalǵansha, myna avtokólik ýchaskelerinde:
- Táýelsizdik dańǵyly boıynsha, Qoshqarbaev kóshesinen Shámshi Qaldaıaqov kóshesine deıin; - Baıtursynov kóshesi boıynsha B.Momyshuly kóshesinen Amanjolov kóshesine (burynǵy Obaǵan kóshesi) deıin; - Amanjolov kóshesi boıynsha Qoshqarbaev kóshesinen Nájimedenov kóshesine deıin; - Shámshi Qaldaıaqov kóshesi boıynsha Syǵanaq - Orynbor kóshesiniń kólik torabynan Táýelsizdik dańǵylyna deıin kólik quraldarynyń qozǵalysy tolyǵymen jabylatyn bolady.
2 mamyrdan - 7 mamyr aralyǵynda áskerı tehnıkanyń qatysýymen áskerı sherýge daıyndyq jattyǵýlary ótkizilýine baılanysty, myna kóshe ýchaskelerinde:
- Táýelsizdik dańǵyly boıynsha Muńaıtpasov kóshesinen № 46 kóshesine (Hellı Berrı mektebi) deıin; - Saraıshyq kóshesi Túrkistan kóshesinen M - 1 kópirine deıin; - Baıtursynov kóshesi B.Momyshuly kóshesinen Sarykól kóshesine deıin; - Qoshqarbaev kóshesi B.Momyshuly kóshesinen Sarykól kóshesine deıin; - Amanjolov kóshesi Qoshqarbaev kóshesinen Nájimedenov kóshesine deıin; - Syǵanaq kóshesi Túrkistan kóshesinen M - 3 kópirine deıin; - Sh.Qaldaıaqov M - 3 kópirinen Táýelsizdik dańǵylyna deıin; - Toqpanov kóshesi Sharl de Goll kóshesinen B.Momyshuly kóshesine deıin kólik quraldary qozǵalysyna shekteý qoıylatyn bolady.
Osyǵan baılanysty, Astana qalasy ІІD Ákimshilik polıtsııa basqarmasy avtokólik ıelerine ózderiniń qozǵalys baǵyttaryn jáne aınalma jol baǵyttary men jeke avtokólikterin qoǵamdyq kólikterge aıyrbastaı turý jaǵdaılaryn erterek jáne aldyn ala josparlap alýlaryn ótinedi.
Merekelik is-sharalar ótkizilý kezeńinde elordalyq polıtseıler kúsheıtilgen tártipte qyzmet atqaratyn bolady. Osyǵan oraı, qoǵamdyq tártipti qorǵaý jáne jol qozǵalysy qaýipsizdigin qamtamasyz etý úshin jalpy Astana qalasy ІІD jol-patrýldik polıtsııa qyzmetkerleriniń 2,5 myńnan astamy jumyldyrylatyn bolady.
