Astanada merekelik etnoaýyl ashylady (FOTO)
ASTANA. QazAqparat - Astanadaǵy «Jeruıyq» saıabaǵynda merekelik etnoaýyl ashylady. Munda qala turǵyndary men qonaqtary qazaq halqynyń ulttyq taǵamdarynan dám tatyp, salt-dástúrlerimen etene tanysa alady, dep habarlaıdy astana.kz.
Saıabaq aýmaǵynda barlyǵy 5 kıiz úı tigiledi. Sonymen qatar kópshiliktiń nazaryna «Shańyraq kóterý» dástúri usynylady. Munda kelgen barlyq astanalyqtar óz qoldarymen kıiz úı qurastyryp, kóshpendi halyqtyń úı tigý mádenıetimen tanysa alady. Etnoaýyldyń erekshelikteriniń biri - sheberler úıinde ulttyq áshekeıler men buıymdar qoıylady. Qonaqtar qolóner sheberleriniń kilem toqyp, zergerlik buıymdardy soǵyp, aǵash oıǵan sátterin tamashalaı alady. Atalmysh kıiz úıde qoldanbaly óner buıymdarynyń kórmesi de uıymdastyrylmaq. Bul jerde tigiletin taǵy bir erekshe kıiz úı - saıatshylar úıinde kóshpeli halyqqa tán ańshylyq ónerdiń qyr-syrymen tanysýǵa bolady.
