Astanada mereke kúnderi 2000-nan astam polıtseı qoǵamdyq tártipti kúzetedi
ASTANA. QazAqparat - Astananyń 17 jyldyǵyna arnalǵan merekelik sharalardy ótkizýge baılanysty Astana qalasy Іshki ister departamenti qoǵamdyq tártipti jáne qala aýmaǵyndaǵy jol qaýipsizdigin qamtamasyz etýge baǵyttalǵan sharalar keshenin uıymdastyrýda.
Sharalardy ótkizý kezeńinde elordadaǵy qoǵamdyq tártip jáne jol qaýipsizdigi qyzmeti kúsheıtilgen narıadpen jumys isteıtin bolady. Oǵan eki myńnan astam polıtsııa qyzmetkerleri, 200-den astam ishki ister departamentiniń avtokóligi tartylady. Oqys oqıǵa týyndaı qalǵan jaǵdaıǵa shuǵyl jáne avarııalyq-qutqarý qyzmetterimen polıtsııanyń birlesken is-qımyly ázirlikke keltirildi.
Qalanyń jabdyqtary men syrtqy resimdelýin saqtaý maqsatynda polıtseıler sahnalyq alańdardy, mádenıet jáne sport nysandaryn kúzetip, zańǵa qaıshy is-qımyldardyń oryn alý faktilerine jol bermeý sharalaryn qabyldaıdy. Merekelik shara ótetin oryndarda ІІD men aýdandyq ІІB basshy quramdary ishinen táýlik boıy kezekshilik uıymdastyrylady.
Merekelik sharalar ótetin kúnderde sharalarǵa qatysýshylardy, elorda qonaqtaryn tasymaldaý úshin avtokólikter bólindi, budan basqa, jurtshylyq kóp jınalatyn oryndarda kólik qozǵalysyn shektep, kólik qoıýǵa ońtaıly oryndardy aıqyndaý josparlanýda.
Aǵymdaǵy jylǵy 4 jáne 5 shildede 17:00-den 03:00-ge deıin merekelik sharalar ótetin ýaqytta Jeltoqsan-Respýblıka-Esil ózeniniń jaǵalaýy boıyndaǵy kósheler jabylady.
Sondaı-aq 4-7 shildede saǵat 18:00-den 01:00-ge deıin Abaı dańǵylynan Beıbitshilik kóshesi boıynsha Kenesary kóshesine deıin jolda kólik qozǵalysy toqtatylady. 3-5 shilde aralyǵynda saǵat 19:00-den 01:00-ge deıin «Astana-Arena» stadıony, «Saryarqa» velotregi, «Alaý» konkımen júgiretin stadıonynyń kólik qoıatyn ornynda qozǵalys shekteledi.
Osyǵan baılanysty, Astana q. ІІD ákimshilik polıtsııa basqarmasy elorda turǵyndary men qonaqtaryn qozǵalys baǵyttaryn aldyn ala josparlaýǵa shaqyrady.
