Astanada mereke qarsańynda azyq-túlik baǵasy baqylaýǵa alynady

ASTANA. KAZINFORM — Saýda komıtetiniń tóraǵasy Ernur Jáýtikbaev Astanadaǵy saýda bazarlaryn aralady. Komıtet tóraǵasy mereke qarsańynda bazardaǵy baǵalarǵa monıtorıng jasap, saýda ústemesin arttyrý faktilerin anyqtady, dep habarlaıdy vedomstvonyń baspasóz qyzmeti.

Máselen, elorda bazarynda ornalasqan azyq-túlik dúkeninde qaraqumyq baǵasy 500 teńge dep kórsetilgen. Baǵa komıtet tóraǵasynyń birden nazaryn aýdardy. Óıtkeni Ernur Jáýtikbaevtyń aıtýynsha, qaraqumyqtyń baǵasy qalaı alǵanda da 500 teńgege jetpeıdi. Dúken qaraqumyqty 275 teńgeden satyp alǵan, artynsha 82 paıyz saýda ústemesin qosyp, 500 teńgeden saýdalaǵan. Áleýmettik mańyzy bar taýar túrlerine maksımal saýda ústemesi 15 paıyzben eseptegende, osy dúkendegi qaraqumyq baǵasy kóp degende 316 teńgeden satylýy kerek bolǵan.

Saýda komıtetiniń tóraǵasy Astana qalasy boıynsha saýda jáne tutynýshylardyń quqyǵyn qorǵaý departamentine fakt boıynsha tekseris júrgizýdi tapsyrdy.

Ernur Jáýtikbaev Astanadaǵy «Saýran», «Shanhaı-Kók bazar», «Sharyn», «Saryarqa», «Asem», «Astanalyq», «Uljan» jáne «Soǵym fest» et jármeńkesi ótip jatqan «Kerýen Joly» bazarlaryn aralady. Bazar ıeleri jáne elordaǵa kókónis pen jemis-jıdek jetkizetin ımporttaýshylarmen kezdesken komıtet tóraǵasy mereke qarsańynda baǵany negizsiz kótermeýdi, et ónimderin deldalsyz tikeleı sharýalardan jetkizýdi uıymdastyrýdy tapsyrdy.

— Saýda mınıstrligi mereke qarsańynda naryqtaǵy baǵany turaqty ustaý úshin keshendi jumys júrgizip jatyr. Tek qana saýda jelilerimen emes, saýda bazarlary da qatań baqylaýda bolady. Іri ımporttaýshylarmen jeke jumys júrgizip jatyrmyz. Sonyń negizinde qarasha aıynda áleýmettik azyq-túlik baǵasy turaqty boldy. Mereke qarsańynda tek áleýmettik azyq-túlik qana emes, halyq jıi tutynatyn taýar baǵalaryn turaqtandyrý sharalaryn qabyldaımyz, — dedi Saýda komıtetiniń tóraǵasy Ernur Jáýtikbaev.

Budan buryn Almatydaǵy birqatar iri saýda jelisi baǵany negizsiz ósirgeni úshin jaýapqa tartylǵan edi.