Astanada mereke aldynda órt qaýipsizdigi sharalary túsindirilýde
ASTANA. QazAqparat - Elordada jańa jyldyq mereke kúnderi aldynda aldyn-alý jumystary qolǵa alyndy, dep habarlaıdy Astana qalasy TJD memlekettik til jáne aqparat toby.
Jańa jyl - asyǵa kútetin mereke. Salıýtter, pıtardalar men bengal shyraqtary bul merekeniń basty sáni ekendigi belgili. Jańa jyldyq mereke kúnderi oryn alatyn qaıǵyly jaıttardyń kórsetkishteri «sóılep» turǵandaı, azamattarymyz pırotehnıkalyq buıymdardy qoldaný kezindegi qarapaıym qaýipsizdik talaptaryna nemquraıdy qaraıtyndyqtaryn kórsetip otyr.
Qaıǵyly jaıttardyń aldyn-alý maqsatynda Astana qalasy TJ departamentiniń Almaty aýdany TJB qyzmetkerleri adamdar kóp shoǵyrlanǵan oryndarda órttiń aldyn-alýǵa baǵyttalǵan jumystardy júrgizýde. Atalmysh jumystar sheńberinde jańa jyldyq is-sharalar uıymdastyrylatyn oryndar nazarǵa alynýda.
Astanalyq TJD qyzmetkerleri qoǵamdyq mekemelerdiń basshylyǵy men qyzmet kórsetýshilerine órt qaýipsizdik erejelerin túsindirip, arnaıy jadynamalar men paraqshalar taratty. Іs-shara barysynda merekelik sharalardy ótkizý kezinde adam kóp shoǵyrlanǵan jerlerdegi pırotehnıkalyq buıymdardy, elektr gırlıandalaryn qoldaný erejeleri men shyrshalardy ornatýdyń tártibi túsindirildi.
Búgingi kúni basqarmanyń ınjenerlik-ınspektorlyq quramy túngi klýbtar men meıramhanalardyń basshylyǵy, jalǵa alýshylarmen arnaıy kezdesýler uıymdastyryp, 400-den astam jadynamalar taratylyp, 30 mekemege bas suqqan bolatyn. Bul baǵyttaǵy jumystar jalǵasýda.
