Astanada «Meniń tús álemim» atty sýret kórmesi ótti

Astana tórinde ashylǵan bul óner kórmesine beıneleý óneriniń túrli janrynda salynǵan,  qoǵamǵa oı salatyn, tárbıelik mazmuny bar, kórkemdik mánerimen erekshelenetin shyǵarmalar qoıylǵan. Kórmege kelgen jurt atalǵan týyndylarǵa qyzǵýshylyq tanytyp,  ystyq yqylaspen qarap shyqty.

Avtor kórmege qoǵamnyń ártúrli taqyryptaryn arqaý etken týyndylarynyń bir bóligin kópshilik nazaryna usynǵanyn jetkizdi.

«Men osy ýaqytqa deıin shyǵarmashylyǵymda aqparattyq karıkatýraǵa basymdyq berip kelemin. Bul janr ómirdegi jaǵymsyz qubylystardy, kileńsizdikterdi ashyp kórsetip, qoǵamdy onymen kóresýge, kemshilikterdi túzetýge úndeıdi. Mysaly, «Mádenıetti qalanyń, mádenıetsiz turǵyny bolýdan saqtanaıyq!» dep atalatyn týyndym osyndaı taqyrypqa arnalǵan. Sonymen birge kórmege «Qazaq eli», «Erkindiktiń sımvoly», «Meniń balalyq shaǵym», «Kókpar tartý», «Atameken» sekildi maıly boıaýmen salynǵan shyǵarmalarym qoıylǵan. Bul týyndylardyń árbiriniń ózindik erekshe mazmuny, kótergen taqyryby bar. Jalpy shyǵarmalaryma meniń taǵdyrym, otanyma, elime degen mahabbatym, kóńil-kúı tebirenisim, ultymnyń jaýhar mádenıeti,  salt-dástúri, tirshilik daǵdysy, qazaqtyń baıtaq dalasynyń ásem kórinisi arqaý bolǵan», - deıdi sýretshi Qaırat Jáıirbekuly. 

Kórmeniń ashylýyna arnaıy kelip qatysqan Qazaqstan Sýretshiler odaǵynyń múshesi,  belgili músinshi Toqtar Ermekov, Qazaqstannyń mádenıet qaıratkeri Ómiráli Tileýlıev sııaqty belgili sýretshiler Qaırat Jáıirbekulynyń eńbekterine óz baǵalaryn berip, shyǵarmashylyq jolynyń nátıjeli,  jemisti bolýyn tiledi. 

«Qaırattyń jumystary san-salaly aýqymdylyǵymen, halyqtyń kózin ashatyn, oı salatyn ushqyrlyǵymen erekshelenedi. Ol jan-jaqty sýretshi, shyǵarmalarynda ulttyń bolmysyn kórsetken maıly boıaý keskindemeleri, grafıkalary, belgili adamdardy beınelegen sharjdary, qoǵamnyń minin ashqan karıkatýralary men plakattary kórinis tapqan. Bolashaqta taǵy da talǵamy bıik týyndylar ómirge ákele beredi dep senemin», - deıdi belgili músinshi Toqtar Ermekov. 

Qaırat Jáıirbekulynyń qazaq halqynyń bolmysyn beınelegen kóptegen týyndylary Qytaı jerinde ótken sýretshiler festıvalderinde kórsetilip, joǵary baǵalanyp, marapattalǵan. Al, Qazaqstan eline qonys aýdarǵannan keıinde shyǵarmashylyq jumyspen belsendi aınalysyp, respýblıkalyq, halqaralyq sýretshiler festıvalderine úzbeı qatysyp keledi. Onyń talǵamdy, óresi bıik shyǵarmalarynyń birqatary, sýretshiler shyǵarmalaryn toptastyrǵan  ártúrli arnaıy jınaq katalogqa engen.   

Sondaı-aq,  ol  QR Mádenıet jáne sport mınıstrliginiń tapsyrmasymen, qazaqtyń mıftik keıipkerlerin birizdilendirý maqsatynda ótken respýblıkalyq baıqaýǵa qatynasyp, júldeger atanǵan. Osy baıqaý nátıjesinde irktelinip alynǵan týyndylar negizinde qurastyrylǵan «Qazaqtyń mıftik keıipkeri» atty jınaqqa shyǵarmalary kirgizilgen. Sonymen qatar Nazarbaev zııatkerlik mektepterine arnalǵan «Ádebıettik oqý» kitabyn qatysty sýrettermen bezendirýge atsalysqan.