Astanada «Meniń súıikti mýltfılmim» aktsııasy ótti
ASTANA. QazAqparat - «Balapan» telearnasy Astana qalasynda otandyq anımatsııalyq ónimderdi keńinen nasıhattaýǵa jáne Halyqaralyq balalardy qorǵaý kúnine arnalǵan «Meniń súıikti mýltfılmim» atty aktsııasyn ótkizdi, dep habarlaıdy «Qazaqstan» RTRK baspasóz qyzmeti. Shara «Mega-Astana» oıyn-saýyq ortalyǵyndaǵy «Marvın» dúkeninde ótti. Atalmysh aktsııa buǵan deıin Almaty qalasynda ótkizilgen bolatyn. Onyń negizgi maqsaty - otandyq anımatsııany nasıhattaý, qoldaý kórsetý.
Atalmysh is-sharaǵa Astana qalasynyń búldirshinderi qatysty. Olar «Balapan» telearnasynan kórsetiletin «Álı men Aııa» mýltfılmindegi keıipkerlerdiń sýretin salyp, boıaý saıysyna tústi. Vıktorınalyq suraqtarǵa jaýap berip, ermeksazben túrli músinder jasady. Sondaı-aq, mozaıka qurastyryp, túrli oıyndar oınady. Jeńimpazdarǵa syılyqtar, tátti toqashtar taratyldy.
Aıta ketý kerek, 20 serııadan turatyn jáne zamanýı 3D anımatsııamen jasalǵan «Álı men Aııa» mýlttoptamasy mektep jasyna deıingi balalardyń oı-órisin, oılaý qabiletin keńeıtip, aınaladaǵy adamdarmen qarym-qatynasyn damytýda tárbıelik máni orasan zor taptyrmas qural bolyp tabylady.
Mýlthıkaıa óndirisine halyqaralyq dárejede tanymal anımatorlar qatysty. Mýlttoptamada aýylǵa ata-ájesine kelgen Álı men Aııa arqyly teledıdar aldyndaǵy baldyrǵandardy qorshaǵan ortamen tanystyryp, kishkentaı balalardyń atasy men ájesine suraq qoıýy men oǵan alynatyn jaýaptar tek áńgime retinde emes, utymdy anımatsııalyq grafıkalyq sheshimder arqyly kórinis tabady. Ár bólimde qazaqtyń ádet-ǵuryp, salt-dástúrlerin, ulttyq aspaptar, oıyndar, taǵamdar, buıymdardy úıretý arqyly ata-baba dástúrimen tanystyryp, rýhanı baılyǵymyz balalardyń boılaryna sińiriledi.
Mektep jasy aldyndaǵy búldirshinderdi árip tanytyp, sanamaqqa, án saldyryp, ulttyq bıdiń keıbir jeńil elementterin úıretedi. Telehıkaıanyń ár bóliminde kem degende bir jańa án sábıler úshin jazylyp, olardyń tez jattap alyp, aıtýyna múmkindik beredi.
Bir sózben aıtqanda, mýlthıkaıanyń árbir bóliminde sábıdiń ózin qorshaǵan ortany tanı bastaıtyn eń súıkimdi, eń qylyqty shaǵynda "Ol kim? Bul ne?" degen suraqtarǵa molynan jaýap beriledi.
