Astanada «Men kórgen álem - meniń shabytty ómirim» III respýblıkalyq baıqaýy ótti - FOTO
ASTANA. QazAqparat - Búgin, 2 mamyrda elordada «Men ómir súretin álem - jasampaz ómir» atty QR balalar áleýmettik mekemeleriniń tárbıelenýshileri arasyndaǵy kórkemsýret jumystarynyń III respýblıkalyq baıqaýynyń jeńimpazdaryn marapattaý rásimi ótti.
Bul týraly «Bolashaq» qaýymdastyǵynyń baspasóz qyzmetinen habarlady.
Іs-sharany «Nur Otan» partııasynyń, QR Prezıdenti janyndaǵy memlekettik qyzmet akademııasynyń, QR BǴM balalar quqyqtaryn qorǵaý komıtetiniń qoldaýymen «Bolashaq» qaıyrymdylyq qory uıymdastyrdy. Baıqaý seriktesteri - «ıÝNESKO» balalar kórkem óner mektep-klýby, Radisson Hotel Astana qonaq úıi, «Ajar» SSO.
Baıqaý balalar úıleriniń, ınternattyq mekemelerdiń, arnaıy korrektsııalyq mektepterdiń daryndy tárbıelenýshilerin anyqtap, olarǵa qoldaý kórsetýge, shyǵarmashylyq qabiletterin damytýǵa baǵyttalǵan. Buǵan 11-16 jas aralyǵyndaǵy balalar qatysty. Respýblıka boıynsha 72 balalar áleýmettik mekemesinen 300-den astam jumys kelip tústi. Olardyń arasynda kórkem sýretter men túrli ádistermen jasalǵan sándik-qoldanbaly óner buıymdary bar.
11-13 jas aralyǵyndaǵy sanatta birinshi orynǵa Taldyqorǵan qalasyndaǵy estý qabileti tómen jáne sańyraý balalarǵa arnalǵan oblystyq mektep-ınternatynyń ókili Baqytbek Balǵyn jáne Aqtóbe oblysynyń estý qabileti buzylǵan balalarǵa arnalǵan mektep-ınternatynyń ókili Juldyzaı Qankeldi ıe boldy. 14-16 jas aralyǵyndaǵy sanatta birinshi oryndy Zyrıanovsk qalasynyń estý qabileti buzylǵan balalarǵa arnalǵan №2 korrektsııalyq mektep-ınternatynyń ókili Vladımır Ojogın men Taraz qalasyndaǵy Q. Sarymoldaev atyndaǵy №1 balalar úıiniń tárbıelenýshisi Baqytjan Álipbaev enshiledi.
«Bıylǵy óner saıysy buqaralyq sıpatqa ıe. Elimizdiń barlyq óńirlerindegi 72 balalar úıinen 335 jumystyń túskeni bizdi erekshe qýantady. Bul biz úshin eń joǵary kórsetkish. Sonymen qatar, baıqaýǵa qatysqan múmkindikteri shekteýli daryndy balalardyń sany da ósip otyr. Baıqaýdyń aqtyq kezeńine bıyl múmkindigi shekteýli alty bala qatysty. Bizdiń maqsatymyz - mundaı balalar úshin áleýmettik lıft qalyptastyrý. Bıyl daryndy jastarǵa qoldaý kórsetý baǵdarlamasynyń sheńberinde bizdiń Qor baıqaýǵa qatysqan balalardyń shyǵarmashylyq qabiletin damytýǵa kómek kórsetedi. Baǵdarlamanyń baǵyttarynyń biri - balalardyń kásibı ósýi, baıqaý qorytyndylaryna saı balalar shyǵarmashylyq mamandyqtar boıynsha joǵary oqý oryndaryna túsý úshin áıgili sýretshilerdiń minezdemelerine ıe bolady. Shyǵarmashylyq baıqaýlardy ótkizetin barlyq azamattarǵa balalar úılerindegi, ınternattardaǵy, arnaıy korrektsııalyq mektepterdegi jas óskinderdiń mundaı is-sharalardan qalys qalmaýynyń mańyzdylyǵyn jetkizgim keledi. Olardyń arasynda daryndylar barshylyq, bizdiń baıqaýǵa jyl saıyn túsetin, álemge degen názik mahabbatpen jasalǵan jumystar buǵan dálel. Balalardyń shyǵarmashylyq áleýetiniń qoǵam tarapynan qoldaý tapqanyn kórgimiz keledi», - deıdi «Bolashaq» qaıyrymdylyq qorynyń dırektory Dınara Sháıjúnisova.
Marapattaý rásimi ótkizilgen kúni «Ajar» saýda-saýyq ortalyǵynda baıqaý qatysýshylarynyń kórkem jumystarynyń jármeńke-kórmesi ashyldy. Kelýshiler jas daryndardyń sýretterin nemese shyǵarmashylyq buıymdaryn satyp ala alady. Kórmeden túske qarajat jumys avtorlaryna syılyqtar satyp alýǵa jumsalady.
Eske sala keter jaıt, baıqaý VI Qysqy qaıyrymdylyq balynan túsken qarajat esebinen ótkizildi.
