Astanada «Men qazaqpyn» megajobasynyń túsirilimi júrip jatyr
ASTANA. QazAqparat - Astanada «Men qazaqpyn» halyqaralyq megajobasynyń túsirilimi júrip jatyr, dep habarlaıdy QazAqparat tilshisi.
«Men qazaqpyn» halyqaralyq baıqaýdyń jalpy irikteý kezeńi aıaqtalyp, televızııalyq nusqasynyń túsirilimi bastaldy.
Osymen ekinshi jyl qatar ótkizilgen megajobanyń negizgi maqsaty - qazaqtyń dástúrli án aıtý, terme, kúı tartý ónerin nasıhattaý jáne dástúrli óner janashyrlarynyń mártebesin kóterý.
Baıqaýdyń taǵy bir ereksheligi - qatysýshylar zamanaýı nemese avtorlyq shyǵarmalardy emes, dástúrli halyq án, kúı, termelerin oryndaıdy. Sol arqyly uıymdastyrýshylar umyt bolǵan ulttyq ónerdi jaryqqa shyǵarýdy maqsat etip otyr.
Jalpy irikteý kezeńinen 49 qatysýshy televızııalyq túsirilimge joldama aldy. Onyń ishinde Mońǵolııadan - 3, Reseıden - 2, Japonııadan - 1 qatysýshy, qalǵany óz elimizden. Búgingi túsirilimnen 32 úmitker kelesi kezeńge joldama alady.
«Jobaǵa qatysýshylar men qatysqysy keletin ulttyq ónerdi ulyqtaýshylardyń sany jyl sanap artýda. Byltyr atalǵan jobaǵa qatysýǵa 700 ótinish tússe, bıyl 2 myńnan asa ótinish qabyldandy. Іrikteý kezeńi belgili júıe boıynsha aýyl, aýdan, oblys, al odan shyqqandar respýblıkalyq televızııalyq túsirilimge joldama aldy. Odan bólek, halyqaralyq irikteý boldy. Qatysýshylardyń sanymen qatar, sapasy da joǵary dep aıtýǵa bolady. Bul - ádilqazylardyń sózi», - deıdi «Men qazaqpyn» jobasynyń avtory jáne bas prodıýseri Qýanysh Súleımenov.
Baıqaýda 18 ben 40 jas aralyǵyndaǵy dástúrli ánshi, kúıshi, termeshiler baq synaýda. Qazylar alqasy quramynda memleket jáne qoǵam qaıratkeri Myrzataı Joldasbekov bastaǵan basqa da óner maıtalmandary bar.
«Estradalyq án aıtý óneri sharyqtap turǵan kezde dástúrli ánmen tańǵaldyrý qıyn. Onyń óziniń tyńdarmandary men synshylary bar. Mońǵolııadan irikteý kezeńine jalpy sany 50-den asa úmitker qatysty, sonyń ishinen 3 adam respýblıkalyq túsirilimge joldama aldyq. Men dástúrli án aıtý atalymy boıynsha qatysyp jatyrmyn. Búgin Salǵaranyń «Jıyrma bes» ánin oryndadym. Ádilqazylar jaqsy pikirde boldy, qandaı baǵa beretinin ýaqyt kórsetedi», -deıdi Mońǵolııadan kelgen qatysýshy Qadyhan Manaıuly.
«Men qazaqpyn» mega jobasynyń fınaly jeltoqsanda, Astanada bolady.
