Astanada «Memorıaldyq aımaq» izdeý jasaǵynyń 47-shi ekspedıtsııasyna shyǵaryp salý rásimi ótti
ASTANA. KAZINFORM – Astanada Qazaqstan Qarýly kúshteriniń Ulttyq áskerı-patrıottyq ortalyǵynda Sankt-Peterbýrg mańyndaǵy Sınıavın bıiktikterinde qaza tapqan qazaqstandyq jaýyngerlerdiń súıekterin izdeýmen aınalysatyn «Memorıaldyq aımaq» izdeý jasaǵyn ekspedıtsııaǵa saltanatty túrde shyǵaryp salý rásimi ótti.
Іs-sharaǵa Májilis depýtaty Pavel Kazantsev, UÁPO-nyń Almaty fılıaly janyndaǵy Jaýyngerlik dańq murajaıynyń basshysy Alýa Baıqadamova, áskerı qyzmetshiler, Qarýly Kúshterdiń ardagerleri, L. N. Gýmılev atyndaǵy Eýrazııa ulttyq ýnıversıtetiniń áskerı kafedrasynyń oqytýshylary men stýdentteri qatysty.
Keńes Odaǵynyń Batyry general-maıor Ivan Panfılovtyń nemeresi Alýa Baıqadamova izdeýshilerdiń mıssııasynyń mańyzdylyǵyn atap ótip, «Memorıaldyq aımaq» jasaǵynyń komandıri Maıdan Qusaıynovqa alǵys hat tabystady.
Májilis depýtaty Pavel Kazantsev izdeý jasaǵynyń kópjyldyq eńbegin tek mańyzdy ǵana emes, shyn mánindegi erlik dep atady.
— Sizderdiń osy jumysty bastaǵandaryńyzǵa jarty ǵasyrǵa jýyq ýaqyt boldy. Sizder jaı ǵana habar-osharsyz ketken jaýyngerlerdiń súıekterin taýyp qana qoımaı, batyrlardy qaıta tiriltip, ýaqyt pen urpaqtardy jalǵap turǵan kıeli ispen aınalysyp jatyrsyzdar, — dedi depýtat.
Maıdan Kómekuly bul jolǵy 15 kúndik ekspedıtsııaǵa izdeý jasaǵynyń segiz ardageri qatysatynyn aıtty. Olardyń ishindegi eń jasy — 57 jasta, al eń úlkeni, ıaǵnı komandırdiń jasy — 82-de.
— Biz bul joly «Urysqa tek qarttar ǵana barady» degen uranmen bara jatyrmyz. Kúnine orta eseppen batpaqty jerde 30 shaqyrym júrip ótemiz. Biraq men bul Sınıavın batpaǵy men bıiktiginde «eńbek etý» múmkindigin eshbir álemdegi kýrortqa aıyrbastamaımyn. Biz qasıetti ispen aınalysyp jatyrmyz — sol jerlerde máńgi qalǵandar úshin aıaqtalmaǵan soǵysty aıaqtap kelemiz degen oı meni shabyttandyrady, — dedi Maıdan Qusaıynov.
Aıta keteıik, Ekinshi dúnıejúzilik soǵys jyldarynda Sankt-Peterbýrg mańyndaǵy Sınıavın batpaqtary men bıiktikterinde Aqmola jáne Petropavl qalalarynda qurylǵan qazaqstandyq 310-shy jáne 314-shi atqyshtar dıvızııalary erlikpen shaıqasqan bolatyn.
Eske salsaq Máskeýde qazaqstandyq jaýyngerdiń súıegi tapsyryldy.