Astanada memlekettik emhanalardyń máselelerin sheshýge arnalǵan Health AI hakatony bastaldy
ASTANA. KAZINFORM — Astana AI Week aıasynda memlekettik emhanalardyń kúndelikti jumysynda kezdesetin máselelerge jasandy ıntellekt arqyly sheshim ázirleýge baǵyttalǵan Health AI hakatony ótip jatyr.
MedTech startapynyń negizin qalaýshy Toǵjan Qojalynyń aıtýynsha, jobanyń basty ereksheligi — ázirleýshiler oıdan shyǵarylǵan tapsyrmalarmen emes, memlekettik emhanalardyń naqty suranystarymen jumys isteıdi.
— Startaptarda ıdeıa kóp. Biraq olar kóbine naqty derekke qol jetkize almaıdy, ázirlegen sheshimin qaıda synaıtynyn bilmeıdi. Sondyqtan biz emhanalardyń ózinen naqty keısterdi jınadyq. Qatysýshylar sol máselelerdi sheship qana qoımaı, óz ónimin klınıkada synap kórýge múmkindik alady, — dedi spıker.
Onyń aıtýynsha, jobaǵa Astanadaǵy 14 memlekettik emhana qatysyp, jasandy ıntellekt kómegimen sheshýdi qajet etetin 10 naqty mindetti usynǵan. Úzdik jobalar keıin klınıkalyq ortada pılottyq rejımde synaqtan ótkizilip, tájirıbege engizilýi múmkin.
Hakaton aıasynda qatysýshylar úsh baǵyt boıynsha jumys isteıdi.
Birinshi baǵyt — Digital Patient Journey. Bul baǵyt patsıentterdiń medıtsınalyq qyzmet alý protsesin jeńildetýge arnalǵan. Komandalar emhanalardyń aqparattyq júıelerin biriktirý, azamattardyń ótinishterin tsıfrlandyrý, sondaı-aq turǵyndardy skrınıngke SMS pen messendjerler arqyly avtomatty túrde shaqyrýǵa arnalǵan sheshimder ázirleıdi.
— Emhanalarda azamattardy qabyldaý júıesine qatysty máseleler az emes. Ásirese, egde jastaǵy adamdar úshin dárigerge jazylý, tirkeýden ótý, qajetti aqparatty alý qıyndyq týǵyzady. Sonyń saldarynan jaqyndarynyń kómegine júginýge týra keledi. Biz osy protsesti jeńildetetin sheshimderdi kútemiz, — dedi Toǵjan Qojaly.
Ekinshi baǵyt — AI Management. Munda jasandy ıntellektini emhanalardy basqarý isine engizýge basymdyq beriledi. Atap aıtqanda, bıýdjetti josparlaý, mindetti áleýmettik medıtsınalyq saqtandyrý júıesi aıasyndaǵy kelisimsharttardy baqylaý, kadrlyq jumysty avtomattandyrý jáne medıtsınalyq uıymdardyń basqarý tıimdiligin arttyrýǵa arnalǵan jobalar ázirlenedi.
Úshinshi baǵyt — Clinical AI. Bul baǵyt medıtsınalyq kómektiń sapasyn jaqsartýǵa baǵyttalǵan. Qatysýshylar baýyr aýrýlaryn erte anyqtaý, dárigerlerdiń klınıkalyq sheshim qabyldaýyna kómektesetin júıelerdi ázirleýmen qatar, dárigerlerdiń ózara keńes berýine jáne patsıenttermen qashyqtan jumys isteýine múmkindik beretin tsıfrlyq sheshimder usynady.
Toǵjan Qojalynyń aıtýynsha, hakatonǵa qatysýshylar medıtsınalyq uıymdardyń patsıentterine qatysty jeke málimetteri kórsetilmegen derektermen jumys istep, dárigerler men Health AI salasynyń sarapshylarynan keńes alady. Sonymen qatar óz jobalaryn AI Sandbox platformasynda synap, keıin naqty emhanalarda pılottyq rejımde engizýge múmkindik alady.
Uıymdastyrýshylardyń málimetinshe, mundaı tehnologııalar medıtsınalyq derekterdi óńdeý ýaqytyn qysqartyp, patsıentterdi qabyldaý protsesin jedeldetýge, medıtsına qyzmetkerleriniń jumysyn jeńildetýge jáne densaýlyq saqtaý uıymdarynyń jumys tıimdiligin arttyrýǵa múmkindik beredi.
Aıta keteıik, qazirgi tańda Qazaqstannyń elektr júıesin basqarýda jasandy ıntellekt qoldanyla bastady.
