Astanada Memlekettik turǵyn úı qurylysy baǵdarlamasynyń úmitkerler tiziminen 700-den astam adam alynyp tastaldy - I. Tasmaǵambetov
ASTANA. 23 sáýir. QazAqparat /Jasulan Amanbaıuly/ - Astanada 2008-2010 jyldarǵa arnalǵan Memlekettik turǵyn úı qurylysy baǵdarlamasynyń úmitkerler tiziminen 700 -den astam adam alynyp tastaldy. Bul týraly búgin tilshilerge jalpyqalalyq senbilik barysynda elorda ákimi Imanǵalı Tasmaǵambetov málim etti.
Onyń aıtýynsha, bıyl memlekettik baǵdarlamanyń ekinshi bóligi boıynsha Astanada 2 344 páter paıdalanýǵa beriledi. Oǵan 27 myń úmitkerden ótinish túsken.
«Qazirgi ýaqytta ol ótinishter ádilet organdaryna joldanyp, respýblıka aýmaǵynda jáne Astanada úmitkerlerdiń jeke menshiginde jyljymaıtyn múliktiń bar-joǵy tekserilýde»,-deıdi I. Tasmaǵambetov.
Qala ákiminiń aıtýynsha, barlyq 27 myń ótinish ádilet organdarynan tekseristen ótpeı, páterlerdiń ıegerlerin anyqtaý jumysy bastalmaıdy. Sebebi olar baldyq júıe boıynsha esepteledi.
«Qazirgi ýaqytta 6 myńnan astam úmitkerdiń qujattary tekserildi, olardyń 737-de úıleri bar bolyp shyqty. Árıne, ondaı azamattar turǵyn úı alańyna úmittene almaıdy»,-dedi ákim.
Ázirshe 6 myń úmitkerdiń qujattary boıynsha jumystar júrgizilip jatyr. Bul sharalar aıaqtalǵannan keıin, páter ıegerleriniń tizimderi ınternette jarııalanady.
