Astanada memlekettik qyzmetshiler arasynda spartakıada bastaldy
ASTANA. QazAqparat - Memlekettik qyzmetshiler arasynda sporttyń 12 túrinen báseke ótýde, dep habarlaıdy QazAqparat tilshisi Astana qalasy Mádenıet jáne sport basqarmasyna silteme jasap.
«17 aqpan men 5 mamyr aralyǵynda jyl saıynǵy memlekettik qyzmetshiler arasyndaǵy HІ spartakıada bastaldy. Jarysqa qatysýǵa Astana qalasynyń aýdan ákimdikteri, departamentter, basqarmalar men olarǵa qarasty mekemelerdiń qyzmetkerlerinen quralǵan komandalar shaqyrylady», - dep habarlaıdy basqarmanyń baspasóz qyzmeti.
Jarys 12 sport túrinen ótedi: shańǵy, voleıbol, shahmat, shaǵyn fýtbol, ústel tennısi, qol kúresi, estafeta, jazǵy prezıdenttik kópsaıys, doıby, arqan tartys, asyq atý jáne bılıard.
Sporttyq sharany uıymdastyrýshy jáne jaýapty qalalyq Mádenıet jáne sport basqarmasy men Astana qalasy ákiminiń apparaty.
