Astanada memlekettik qyzmetshiler arasynda Prezıdent testileýleri bastaldy
ASTANA. QazAqparat - Elordada qysqy sport túrleri boıynsha QR Tuńǵysh Prezıdentiniń testileýleri bastaldy. Bul týraly Mádenıet jáne sport mınıstrligi baspasóz qyzmetiniń málimetinde aıtylǵan, dep habarlaıdy QazAqparat.
Atap aıtqanda, elimizdiń ortalyq memlekettik organdarynyń tórt júzge jýyq memlekettik qyzmetshileri shańǵymen normatıvter tapsyrý synaqtaryna qatysyp jatyr.
«QR Tuńǵysh Prezıdenti - Elbasy testileýleri balalar, jastar men eresek adamdardyń fızıkalyq daıyndyǵyna qoıylatyn normatıvti talaptardyń jıyntyǵy bolyp tabylady. Test baǵdarlamasyna halyqtyń jan-jaqty fızıkalyq daıyndyǵyn synaıtyn kúsh qoldanylatyn gımnastıka, jeńil atletıka, oqpen atý, júzý jáne shańǵymen júgirý sekildi sport túrleri engizilgen. Testileýdi ótkizý qaǵıdalaryna sáıkes, qysqy sport túrleri boıynsha synaqtar aqpan-naýryz aılarynda ótkizilse, jazǵy sport túrleri boıynsha sáýir men qazan aılary arasynda uıymdastyrylady»,-dep atap ótilgen vedomstvo málimetinde.
QR MSM Sport jáne dene shynyqtyrý komıtetiniń tóraǵasy Elsııar Qanaǵatov Prezıdent testteri el turǵyndarynyń fızıkalyq daıyndyǵyna monıtorıng júrgizip qana qoımaı, sportqa memleket azamattaryn tartý arqyly salamatty ómir saltyn nasıhattaıtyn iri shara bolyp tabylatyndyǵyn tilge tıek etti.
Jalpy qysqy synaqtardy tapsyrýǵa Qazaqstan Respýblıkasy ortalyq memlekettik organdarynyń tórt júzge jýyq memlekettik qyzmetkerleri qatysýda. Barlyq qatysýshylar jas erekshelikterine oraı erler men áıelder arasynda tórt topqa 24-39, 40-49, 50-59 jáne 60 pen odan joǵary jastaǵy adamdarǵa bólingen.
