Astanada memlekettik qyzmetkerler memlekettik tildi bilý deńgeıi boıynsha synǵa túsýde
STANA. Qazannyń 5-i. QazAqparat /Gúlmıra Álıakparova/ - Astanada Qazaqstan halqy tilderiniń HІІ festıvali aıasynda «Memlekettik til - memlekettik qyzmette» atty respýblıkalyq baıqaý ótip jatyr.
Baıqaýdy uıymdastyrýshy QR Mádenıet mınıstrliginiń Til komıteti. Memlekettik qyzmetshiler arasynda komandalyq quramda mundaı baıqaý osymen ekinshi ret ótkizilip otyr. Oǵan barlyq oblystardan, Astana men Almaty qalalarynan bir-birden jáne QR Ádilet mınıstrliginen jeke bir komanda qatysty.
Baıqaýdy ashqan Til komıtetiniń tóraǵasy Baýyrjan Omarovtyń aıtýynsha, qoǵamdaǵy ártúrli ahýaldarǵa, qalyptasqan jaǵdaılarǵa, tildiń eńserilmeýi men oǵan qatysty problemalardyń tereńdep ketkenine baılanysty memlekettik tildi damytý máselesi osy kúnge deıin sozylyp keledi.
«Qalaı bolǵanda da, memlekettik tildiń aıasy keńeıdi, memlekettik tilde memlekettik qyzmet tynystaı bastady. Bul - baǵdarlamalyq mindetterdiń oryndalǵanynyń kórinisi dep esepteý kerek. Solaı bola tursa da, birqatar problemalar bar. Óıtkeni biz memlekettik qyzmettiń barysyndaǵy memlekettik tildi óz deńgeıinde áli de ornyqtyra almaı otyrmyz. Shyn mánisinde, memlekettik qyzmet pen memlekettik til bir-birimen sabaqtas, bir-birimen etene jaqyn bolýǵa tıis uǵymdar. Memlekettik qyzmettiń jón-josyǵy, dástúr-salty ábden qalyptasyp bolǵanymen, memlekettik til onyń tórine áli tolyq shyǵa almaı jatqanyn jasyrýǵa bolmaıdy», - deıdi ol.
B.Omarovtyń pikirinshe, memlekettik qyzmetkerge aýyzeki tilde sóıleı alý jetkiliksiz. Ol ulttyq mentalıtetke, qalyptasqan dástúrge saı erkin sóıleýi sondaı-aq, minberde turyp jurtty erkin úıirip alyp ketetindeı, is qaǵazdardyń ıin qandyryp, sózdiń máıegin saqtaı otyryp jaza alatyndaı deńgeıde bolýy kerek. Jáne búgingi baıqaý memlekettik qyzmetkerdiń osy ıdealdanǵan beınesin kórsetý úshin uıymdastyrylyp otyr.
Baıqaý bes kezeńnen turdy. Qatysýshylardyń mindeti - olardyń barlyǵyn sahnalanǵan kórinister retinde usyný. Olardyń birinshisi - komandanyń ózin tanystyrýy (toptyń ataýy, urany, maqsaty men mindeti). Ekinshisi - memlekettik tildi basqarý qyzmetinde jáne is júrgizýde qoldaný, pikir almasý. Úshinshisi - qazaq tiliniń jańa tehnologııalarda qoldanylý úrdisin kórsetý. Tórtinshisi - qatysýshylardyń termınderdi bilý deńgeılerin sarapqa salý. Al besinshisi - Elbasynyń, ǵalymdar men saıası qaıratkerlerdiń til týraly aıtqan danalyq sózderinen, bolmasa resmı qujattar men QR Zańdarynan úzindiler keltirý.
Qazylar alqasyna QR Prezıdenti baspasóz hatshysynyń orynbasary, tarıh ǵylymdarynyń kandıdaty Darhan Qydyráli tóraǵalyq etýde.
