Astanada memlekettik qyzmetke turǵysy keletin úmitkerler qashyqtyqtan suhbattasady

ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalasy boıynsha departamenti ákimshilik memlekettik laýazym úmitkerlerimen suhbattasýdy qashyqtyqtan ótkizedi, dep habarlaıdy QazAqparat.

Bul týraly departament dırektory Jazıra Jylqyshıeva 2018 jylǵy jumys qorytyndysyna arnalǵan alqa májilisinde aıtty.

«Jergilikti atqarý organdaryndaǵy ákimshilik memlekettik laýazymdarǵa konkýrs júrgizýde qashyqtyqtan suhbattasý tájirıbesin engizip jatyrmyz. Tsıfrlyq tehnologııalardy engizý arqyly eseptilik 5 esege qysqardy. Kadrlyq, zańgerlik qyzmetter men qarjylyq-sharýashylyq bólim ortalyqtandyryldy. «e-Qyzmet» aqparattyq júıesinde kadrlyq qujattama pılottyq túrde júrgizilip jatyr. Endi kadrlyq qyzmetter kúndelikti qaıtalanatyn jumystarǵa ýaqyt shyǵyndamaıdy», - dedi Jazıra Jylqyshıeva.

Onyń aıtýynsha, 2018 jyly Astanada elektrondy túrde kórsetilgen memlekettik qyzmet sany 74 paıyzǵa deıin ósken. Bul - qyzmet kórsetýshimen tikeleı baılanysty 2,5 esege sheıin qysqartyp, turmystyq jemqorlyqtyń úsh esege deıin azaıýyna múmkindik berdi.

«Memlekettik qyzmetshiler tsıfrlyq saýattylyqtyń úlgisin kórsetýi tıis. Árbir memlekettik qyzmetshi Halyqqa qyzmet kórsetý ortalyqtaryna barmaı, elektrondy-tsıfrlyq qoltańbany belsendi paıdalanýy kerek», - dep óz sózin túıindedi J. Jylqyshıeva.