Astanada memlekettik baǵdarlama boıynsha úı alatyn kezekti adamdar tizimi anyqtaldy
ASTANA. 7 qańtar. QazAqparat - Jańa jyl aldynda jarııalanǵan 2008-2010 jyldardaǵy Memlekettik turǵyn úı qurylys baǵdarlamasy boıynsha qujattar qabyldaý júrgizilip jatyr,
dep habarlaıdy Astana ákimdiginiń baspasóz qyzmeti.
Sonymen qatar turǵyn úı komıssııasy osy memlekettik baǵdarlamanyń alǵashqy sanaty aıasynda salynyp bitken páterlerdi úlestirdi.
2011 jyldyń alǵashqy jumys kúnderinde komıssııa músheleri «balalary bar jas otbasylar», «memlekettik qyzmetkerler», «memlekettik kásiporyn qyzmetkerleri» men «memlekettik qyzmetker bolyp tabylmaıtyn, biraq memlekettik mekemelerde jumys isteıtinder» sanattary boıynsha irikteýden ótken 180 azamatqa úı berý týraly sheshim qabyldady. Olardyń aty-jónderi elorda ákimdiginiń resmı saıtynda jarııa etildi. Olar kelisimshart jasaý úshin turǵyn úı basqarmasyna shaqyrylatyn bolady.
Baspasóz qyzmettiń málimetinshe, qalǵan úılerdi paıdalanýǵa berý ary qaraı jalǵasýda jáne baspana salynyp bitken kezde turǵyn úı komıssııasynyń kezekti otyrysy ótedi. Otyrys qorytyndysy jaıly qosymsha aqparat taratylady.
«Sondyqtan tizim ishinde búgin óz aty-jónderin taba almaǵan tulǵalarǵa qosymsha shara qoldanýdyń, turǵyn úı basqarmasyna barýdyń qajeti joq. Jańa úı alatyndar týraly kezekti aqparat bizdiń saıtymyz ben qalalyq BAQ-tarda jaryq kóretin bolady», - dep atap ótti baspasóz qyzmeti.
