Astanada memlekettik baǵdarlama aıasynda 292 otbasyna páter berildi
ASTANA. QazAqparat - Búgin Astanada 292 otbasy «Nurly jer» memlekettik baǵdarlamasy aıasynda salynǵan úıden páter aldy, dep habarlaıdy QazAqparat Elorda Infoǵa silteme jasap.
Qoshqarbaev kóshesindegi №39 úıden kezekte turǵan 146 otbasy baspanaly boldy. Olar - jeńildikpen páter alǵandar, bıýdjettik uıymdardyń jumysshylary, al qalǵandary «Turǵynúıqurylysjınaqbankindegi» konkýrs boıynsha aldy.
Úıdi qala ákimdiginiń tapsyrysymen «Nurly jer» baǵdarlamasy boıynsha «Meıir-M» JShS salǵan.
Otbasylardyń birnesheýine páter kiltin Astana ákimi Áset Isekeshevtiń ózi tabystady.
«Qymbatty astanalyqtar, búgin - Qasıetti Ramazan aıynyń alǵashqy kúninde 300-ge jýyq otbasy osy úıden páterli boldy, sonyń 146-sy kezekte turǵandar. Jyl sońyna deıin barlyq memlekettik baǵdarlama boıynsha 1 myńnan astam páter salynady. Sizderdi quttyqtaımyn, qonys qutty bolsyn!», - dedi Áset Isekeshev.
Turǵyn úı mańynda Áziret Sultan meshiti, Ulttyq mýzeı, Beıbitshilik jáne kelisim saraıy ornalasqan. Turǵyn úıde jańa «Nurly jol» temirjol vokzalyna qaraı týra tartýǵa bolady.
«Búgin qala ákiminiń qolynan páter kiltin aldyq, qýanyshymyzda shek joq. Osy kúndi kóp kúttik, biraq búgin bári umytyldy, endi bári artta qaldy. Osyndaı baǵdarlamalar kóbeıe bersin, árbir qazaqstandyqtyń óz baspanasy bolsyn!» - dep aǵynan jaryldy elorda turǵyny Dına Qapasheva.
2018 jyly Astanada memlekettik baǵdarlamamen taǵy da 6 kóppáterli turǵyn úı kesheni salynbaq. Olardaǵy páterlerdiń jalpy aýdany 60,58 myń sharshy metr bolady. «Nurly jer» baǵdarlamasy boıynsha 386 páter, al kezekte turǵandarǵa jalǵa beriletin baspana baǵyty boıynsha 677 páter bólinedi.
Ákimdik bergen málimetke qaraǵanda, búgingi tańda 48 579 adam kezekte tur.
