Astanada memleket jáne qoǵam qaıratkeri Nurlan Balǵymbaevqa kóshe ataýy berildi
ALMATY. KAZINFORM — Elordada memleket jáne qoǵam qaıratkeri Nurlan Balǵymbaevqa kóshe ataýy berildi. Búgin atalǵan kósheniń jáne osy kóshe boıyna ornatylǵan eskertkish-taqtanyń ashylýy ótti. Bul týraly qala ákimdigi habarlady.
Іs-sharaǵa Astana qalasy ákimdiginiń, Energetıka mınıstrliginiń ókilderi, munaı-gaz salasynyń ardagerleri, zııaly qaýym ókilderi jáne kórnekti tulǵanyń otbasy men týǵan týystary qatysty.
Atalǵan kóshe elordanyń Esil aýdanynda ornalasqan. Uzyndyǵy – 1100 m. Túrkistan kóshesinen bastalyp, Uly dala dańǵylynda aıaqtalady.
Kósheniń ashylýynda alǵashqy bolyp sóz alǵan Energetıka mınıstriniń orynbasary Álibek Jamaýov Nurlan Balǵymbaevtyń Táýelsiz Qazaqstannyń damýyna qosqan orasan zor úlesin atap ótti. Munaı-gaz salasynyń mamany retinde jergilikti kadrlardy daıarlaý, zamanaýı tehnologııalardy engizý arqyly munaı-gaz ken oryndaryn barlaý, ıgerý, kóptegen kásiporyn ashý sııaqty munaı salasynyń órleýine baǵyttalǵan qyrýar jumys atqarǵanyn aıtty.
Astana qalasy ákiminiń orynbasary Eset Baıken merekelik is-sharadǵa qatysyp, sóz sóıledi.
«Búgin – shaharymyzdyń qoǵamdyq-saıası ómirinde aıtýly kún. Memleket basshysynyń tapsyrmasyna sáıkes elorda kóshesine tarıhı tulǵa, kórnekti memleket jáne qoǵam qaıratkeri Nurlan Balǵymbaevtyń esimi berilip otyr. Bul kóshe qala turǵyndary men qonaqtary kóp júretin ortalyqta ornalasqan. Nurlan Ótepuly Táýelsiz Qazaqstan tarıhynda qajyrly eńbek atqarǵan salıqaly saıasatker, memleketshil tulǵa edi. Ásirese el Úkimetin basqarǵan kezde kóptegen ıgi reformalardy qolǵa alyp, jumysty jaqsartýǵa kóp úles qosty. Al munaı-gaz salasyna jetekshilik etken jyldary eldiń ınvestıtsııalyq áleýetin kóterip, salaǵa tyń serpin berdi. Ol sanaly ǵumyryn el ıgiligine, munaı-gaz salasyn damytýǵa arnap, abyroımen ǵumyr keshti. Ómiriniń biraz bóligin elordada ótkizdi. Osy qalada júrip, mańyzdy sheshimder qabyldady. Atqarǵan kóp isi táýelsiz el tarıhyna altyn árippen jazylǵany sózsiz. Elge qyzmet etken qaıratkerlerdi ulyqtaý, jas urpaqqa nasıhattaý – qajet is. Osy arqyly myqty azamattar býynyn tárbıeleı alamyz. Nurlan Ótepulynyń esimi eshqashan umytylmaıdy dep senimmen aıta alamyn», - dedi Eset Baıken.
Buǵan deıin habarlanǵandaı, 2050 jyly Astanada halyq sany 3,5 mln adamǵa jetýi múmkin.
