Astanada memqyzmetshilerge eńbekaqy tóleýdiń jańa júıesi talqylandy

ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginde ákimshilik memlekettik qyzmetshilerge eńbekaqy tóleýdiń jańa júıesin aprobatsııadan ótkizý qorytyndylary talqylandy. Bul jaıly agenttiktiń baspasóz qyzmeti habarlaıdy.

Otyrysqa agenttik basshylyǵy Ádilet mınıstrliginiń jaýapty hatshysy, Astana qalalyq ádilet departamentiniń basshysy, Astana qalasy ákimi apparatynyń basshysy jáne Mańǵystaý oblysy ákiminiń orynbasary qatysty.

«Qyzmetkerler arasynda agenttik ótkizgen anonım saýalnamada shamamen 95% respondentter eńbekaqy tóleýdiń jańa júıesine kóńili tolatynyn bildirgen. Atap aıtqanda, Mańǵystaý oblysy men Astana qalasyndaǵy basqarmalarda atqarýshy zvenonyń (jetekshi, bas mamandar) ortasha jalaqysy 2,2 ese, Mańǵystaý oblysyndaǵy aýyldyq okrýgter ákimdikterinde 2 ese ósken», - delingen habarlamada.

Sybaılas jemqorlyqqa qarsy kúres boıynsha kóshbasshy elderdiń tájirıbesine súıensek, tómen jalaqy qyzmetshilerdiń para alýyna sebep bolady.

Memlekettik qyzmetshilerdiń jalaqysyn kóterý kadrlardyń kommertsııalyq sektorǵa ketip qalýynyń aldyn alyp, memlekettik qyzmetke úzdik mamandardy tartýǵa septigin tıgizedi.

Jańa júıe engizilgen organdarda jumystan bosaý kórsetkishi 3 ese qysqarǵan, al bos oryndarǵa úmitkerler sany 2 esege artqan.

Máselen, Qaraǵandy oblysynda bas maman laýazymyna 55 adam, OQO-da jetekshi maman laýazymyna 47 adam úmitker bolyp otyr.

Pılottyq jobamen qatar Astana qalasy jáne Mańǵystaý oblysy ákimdikterinde qurylymdardy jáne bıznes protsesterdi ózgertý jumystary júrip jatyr. Astana ákimdiginde basqarmalardyń sany 26-dan 18-ge deıin qysqartyldy.

Qyzmetkerlerdi basqarýdyń biryńǵaı qyzmeti, Baqylaý salasyndaǵy biryńǵaı organ quryldy, Astana qalasy turǵyndaryna járdem retinde «iKomek» keri baılanys júıesi iske qosyldy. Pılottyq jobanyń iske asyrylýyn agenttik jiti baqylap otyr.