Astanada memqyzmetker 30 myń dollar para almaq boldy
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Nurlan Jaxınniń aıtýynsha, keshe ǵana Memlekettik kirister salasynyń taǵy bir qyzmetkeri ústinen qylmystyq is qozǵaldy.
«Astana qalasynyń Memlekettik kirister departamentiniń ekonomıkalyq qylmystardy tergeý qyzmetiniń ofıtseri ustaldy. Kúdikti 30 myń AQSh dollardyń parasyn alýǵa oqtalǵan. Tergeý bastalyp ketti», - dep atap kórsetti N.Jaxın.
Aıta keteıik, buǵan deıin Shyǵys Qazaqstan oblysynda qytaılyq taýarlardy ótkizgeni úshin para alǵan osy salanyń birneshe qyzmetkeri ustalǵan bolatyn. Olar eki jyl boıy zańsyz syıaqy alyp kelgen. Bir kásipker 2016-2018 jyldary aralyǵynda Qytaıdan taýar tasyǵan. Sonyń bárin kedergisiz ákelgeni úshin ekonomıkalyq qylmystardy tergeý qyzmetiniń asa mańyzdy ister boıynsha aǵa ofıtserine jáne Maıqapshaǵaı keden beketiniń bas mamanyna jalpy sommasy 40 myń AQSh dollary kólemindegi parany júıeli túrde berip otyrdy. «Kúdiktilerdiń keńseleri, turǵylyqty jerleri men kólikterin tintý kezinde 13 mln teńgeden astam shetel valıýtasy anyqtaldy. Qazirgi kezde úsh adam qamaýǵa alyndy. Tergeý sharalary júrgizilip jatyr», - dep atap kórsetti N.Jaxın.