Astanada mektepte Álıhan Bókeıhan mýzeıi ashyldy

ASTANA. QazAqparat - Astana qalasyndaǵy №76 mektep-lıtseıiniń ishinen ult kósemi, Alash qozǵalysynyń qaıratkeri Álıhan Bókeıhanǵa arnalǵan mýzeı ashyldy. Bul týraly «Aqjol» partııasynyń baspasóz qyzmetine silteme jasap QazAqparat habarlaıdy.

Mýzeıdiń saltanatty ashylý rásimine ǵalym ári Álıhannyń urpaǵy Ortaı Ábdirahmanov aqsaqal, belgili alashtanýshy ǵalymdar - professor Tursyn Jurtbaı, álıhantanýshy Sultan Han Aqquly, QR UǴA akademıgi Dıhan Qamzabekuly jáne «Aq jol» demokratııalyq partııasynyń múshesi, QR Parlament Májilisiniń depýtaty Berik Dúısembınov, sondaı-aq ata-analar men oqýshylar qatysty.

Ǵalym Sultan Han Aqquly óz sózinde bul Álıhannyń qurmetine resmı túrde ashylǵan tuńǵysh murajaı ekenin aıtyp ótti.

Jańadan ashylǵan murajaıda Alashtyń ardaqty azamatynyń portreti, qaıratkerlik kezeńderin kórsetetin qujattyq derekteri bar arnaıy stendter qoıylǵan.

Sonymen qatar, alashtanýshy ǵalymdar Abaı, Alash, Álıhan, Shákárim, Maǵjan atyndaǵy dárishanalarda sabaq ótkizdi. Al, mekteptiń bastaýysh synyp oqýshylary Alash taqyrybynda mánerlep óleń oqydy.