Astanada «Mektepke jol» aktsııasy aıasynda 200-den astam balaǵa oqý quraldary taratyldy
Elordadaǵy Dostyq úıinde Astana qalasy Qazaqstan halqy Assambleıasynyń uıymdastyrýymen «Mektepke jol» qaıyrymdylyq aktsııasy ótti, dep habarlady qala ákimdiginiń resmı saıty.
Etnomádenı birlestikterdiń músheleri men Analar keńesiniń, «Jomart jan» ortalyǵynyń qoldaýymen ótken is-sharada 200-den astam balaǵa mektep sómkesi men oqý quraldary berildi.
Igi sharanyń ashylý saltanatyna Astana qalasy Іshki saıasat basqarmasynyń basshysy Nurdáýlet Álmuhanov qatysyp, aktsııaǵa qoldaý kórsetken barlyq janashyr jandarǵa alǵys bildirdi.
«Búgin elorda turǵyndarymen birge jyl saıyn dástúrge aınalǵan «Mektepke jol» respýblıkalyq aktsııasynyń kýágeri bolyp otyrmyz. Bul aktsııa Astana qalasynyń Qazaqstan halqy Assambleıasynyń qoldaýymen ótip jatyr. Balalarǵa mektepke qajetti barlyq qural-jabdyqtar beriledi. Osy oraıda aktsııaǵa atsalyp, kómek kórsetken qalalyq Qazaqstan halyq Assambleıasyna jáne demeýshilerge alǵysymdy bildiremin», – dedi basqarma basshysy.
Astana qalasy QHA tóraǵasynyń orynbasary Ámirjan Álpeıisov aktsııanyń maqsatyna toqtalyp ótti.
«Búgingi aktsııanyń maqsaty – oqýshylardy mektepke qajetti barlyq qural-jabdyqpen qamtamasyz etý, turmys jaǵdaıy tómen jáne kópbalaly otbasydan shyqqan balalarǵa jańa oqý jyly aıasynda áleýmettik qoldaý kórsetý. Atalmysh aktsııaǵa elordalyq QHA jyl saıyn belsendi túrde qatysyp keledi», – dedi Ámirjan Álpeıisov.
Esterińizge sala keteıik, 1 tamyzdan 30 qyrkúıekke deıin az qamtylǵan, kóp balaly otbasylar, jetim balalar jáne ata-anasynyń qamqorlyǵynsyz qalǵan balalar qataryndaǵy bilim alýshylarǵa «Mektepke jol» respýblıkalyq aktsııasy aıasynda demeýshilik qarajaty esebinen kerek-jaraqtary bar mektep rıýkzaktary túrinde kómek kórsetiledi. Barlyǵy 8 500-den astam balany qamtý josparlanýda.
Bul aktsııanyń maqsaty az qamtylǵan, kóp balaly otbasylar, jetim balalar jáne jańa oqý jylynyń bastalýyna daıyndyq kezeńinde ata-anasynyń qamqorlyǵynsyz qalǵan balalar qataryndaǵy bilim alýshylarǵa materıaldyq kómek kórsetý jáne áleýmettik sebepter boıynsha balalardyń mektepke barmaýynyń aldyn alý bolyp sanalady.
