Astanada mektepke deıingi bilim berý uıymdaryna vaýcherlik qarjylandyrý engizilip jatyr
ASTANA. KAZINFORM – Astana qalasyndaǵy mektepke deıingi bilim berýdi qarjylandyrýdyń ashyqtyǵy men tıimdiligin arttyrý maqsatynda vaýcherlik qarjylandyrý jobasy engizilip jatyr, dep habarlaıdy elorda ákimdiginiń resmı saıty.
Júıede eń aldymen, búkil qarjylandyrý protsesiniń ashyqtyǵy kózdelgen, munda «aqsha mekemege emes, balaǵa jumsalady» qaǵıdasy júzege asyrylady. Qarajatty esepteý jáne aýdarý ata-analar balanyń qatysý tabelindegi málimetterdi rastaǵannan keıin ǵana júrgiziledi.
2024 jyldyń 17 jeltoqsanynan bastap «Astanadaǵy mektepke deıingi uıymdardy vaýcherlik qarjylandyrý júıesine kóshý» taqyrybynda qaladaǵy mektepke deıingi bilim berý uıymdarynyń basshylarymen kezdesip, túsindirme júrgizilip jatyr.
Belgilengen kestege sáıkes, qazirgi ýaqytta qalanyń bes aýdanyndaǵy jekemenshik jáne memlekettik balabaqshalardyń birinshi basshylary oqytyldy. Jalpy qatysýshylar sany 600 adamdy quraıdy. Kezdesýlerge «Qarjy ortalyǵy» AQ men «Indıgo» aqparattyq júıesiniń ókilderi qatysty.
Mektepke deıingi uıymdardyń birinshi basshylary men qyzmetkerleri oqytylǵan soń ata-analarǵa da bul júıe túsindiriledi.