Astanada mektepke alǵash barǵan balalarǵa kólik kartalary beriledi
ASTANA. QazAqparat - Astana qalasy mektepterinde kúzinde mektep kólik kartasyn berý jumystary iske asyrylady. Bul týraly búgin Astanada ótken baspasóz máslıhatynda «Astana-LRT» JShS-nyń jolaýshylar kóligi boıynsha mamany Ábdihamıt Tamabaev málim etti.
«Oqýshylardyń tizimin ońtaılandyrý úshin elektrondy portal engizilip jatyr. Bul portalda jumys isteý úshin ár mektep dırektorynyń buıryǵymen jeke adam taǵaıyndalǵan. Osy rette ár mektep portalda tek óziniń oqýshylaryn kóre alady. Bıylǵy jyldyń kókteminde júrgizilgen daıyndyq jumystary aıasynda Astanada 78 000 oqýshy kólik kartasyn aldy, ony ASTRA PLAT júıesiniń ekinshi jáne kezekti kezeńderi iske qosylǵanda paıdalana alady», - dedi Á. Tamabaev.
Onyń aıtýynsha, sonymen qatar jańa oqý jylynyń bastalýyna baılanysty Astanada 12 000 bala alǵash ret mektep tabaldyryǵyn attaǵan. Osy rette bul balalarǵa kólik kartalaryn berý josparlanyp otyr. Munymen qosa, elordalyq orta bilim beretin mekemelerde ótken oqý jylynyń sońynda keıbir oqýshylar kólik kartalaryn alyp úlgermegen.
«Árbir mektep portaldaǵy tizimge oqýshylardy engizgennen keıin, biz elektrondy kartalardy daıarlaımyz»,-dep naqtylady ol.
Esterińizge sala keteıik, oqýshy balalarǵa arnalǵan tarıf engizilip, bonýs retinde bir avtobýstan ekinshisine tegin aýysyp otyrý múmkindigi eskerilgen.
ASTRA PLAT jol júrý aqysyn tóleýdiń elektrondyq júıesin engizýdiń barlyq kezeńi iske qosylǵansha, oqýshylar qalanyń qoǵamdyq kólikterinde jol aqysyn qolma-qol tóleýlerine (tolyq bılettiń 50%) nemese qaǵaz jol júrý bıletin kórsetýlerine bolady.
