Astanada mekteparalyq, murajaıaralyq regata jobasynyń jeńimpazy belgili boldy
ASTANA. QazAqparat - Búgin Astana qalalyq T. Aıbergenov atyndaǵy №16 orta mektebi QR Tuńǵysh Prezıdenti Mýzeıiniń uıymdastyrylýymen ótken mekteparalyq, murajaıaralyq regata jobasynda bas júldeni jeńip aldy.
Konkýrs Astana qalasynyń Bilim basqarmasy men QR Qarýly Kúshteri Áskerı-teńiz kúshteri qolbasshysynyń basqarmasy kómegimen ótkizilgen bolatyn.
«Mekteparalyq, murajaıaralyq regata jobasy - Astana qalasy bilim mekemeleri oqýshylarynyń arnaıy baǵdarlar boıynsha «beımálim araldar» - 13 murajaıdy aralaý úshin uıymdastyrylǵan uzaqmerzimdi seriktestik jobasy. Oıyn-saıahattyń sharty boıy QR Tuńǵysh Prezıdenti Mýzeıi atalǵan «araldardy» biriktiretin «Arhıpelag», al araldardyń jetekshileri ózderiniń ekspozıtsııalyq materıaldary negizinde taqyryptyq oıyn «baǵdarlamalaryn» qalyptastyrdy», - dep atap ótti QR Tuńǵysh Prezıdenti Mýzeıi dırektorynyń orynbasary, tarıh ǵylymdarynyń kandıdaty Botagóz Kaıpova.
Onyń aıtýynsha, «Teńiz saıahaty» oıynynyń maqsaty Astana qalasyndaǵy mektepterdiń mýzeılerin aralaýǵa, qazaqstandyq qoǵamnyń damýyna zor úles qosqan ataqty adamdardyń týǵan jeri, ómiri men qyzmeti týraly aqparat alý. Uıymdastyrýshylardyń oılastyrýy boıynsha seriktestik jobasyn júzege asyrýdaǵy kútiletin nátıje - mýzeı jınaǵy, muraǵattyq qujattar arqyly oqýshylardyńtarıhı oı-sanasyn qalyptastyrý, oqýshylardyń eldiń jańa tarıhyn zertteýge qyzyǵýshylyǵyn arttyrý, bilim mekemelerinde mýzeı jumysyn jandandyrý.
«Saıahat-oıyn 2 kezeń boıynsha ótti. 1-kezeńniń baǵdarlamasy 2014 jyldyń aqpan, naýryz, sáýir aılarynda 3 taqyryptyq baǵdar boıynsha ótkizildi. Regata qatysýshylary 1-kezeńniń qorytyndysy boıynsha «Aljır» saıası qýǵyn-súrgin jáne totalıtarızm qurbandarynyń memorıaldy mýzeı-keshenin aralady», - deıdi B. Kaıpova.
Regatanyń 1-kezeńinen súrinbeı ótken komandalar «Arhıpelagqa» shaqyrylyp, onda ornalasqan nysyndardy zerttep, sózjumbaqtar sheship, logıkalyq tapsyrmalardy oryndap, ıntellektýaldyq vıktorınalardyń saýaldaryna jaýap berip, túrli synaqtardan ótti.
Barlyq tapsyrmalardy óte jaqsy oryndaǵan, «Arhıpelagtaǵy» qupııa jerdi tapqan jáne onda jasyrylǵan jumbaq jádigerge durys túsinikteme bergen 16-mekteptiń ekıpajy QR Tuńǵysh Prezıdenti Mýzeıiniń aýyspaly kýbogin qanjyǵasyna baılady.
