Astanada mektep tapshylyǵy bolmas úshin jylyna qansha nysan salý qajet
ASTANA. KAZINFORM — Elordada sońǵy jyldary 50-den astam mektep salyndy. Onyń 24-i Úkimettiń qoldaýymen boı kóterse, qalǵany jergilikti bıýdjet esebinen salynǵan.
Qazirgi tańda qalada úsh aýysymdy mektep joq, alaıda bala sanynyń artýyna baılanysty bilim berý ınfraqurylymyna túsetin júkteme saqtalyp otyr. Bul týraly Astana qalasynyń ákimi Jeńis Qasymbek málim etti.
Qala ákiminiń aıtýynsha, mektep salý qarqyny halyq sanynyń ósýimen tikeleı baılanysty.
— Eki jyl buryn biz jylyna 24 mektep salsaq, qazir 10-15 mektep salyp jatyrmyz. Bıyl birinshi synypqa baratyn balalardyń sany 34-35 myń bolady. Kelesi jyly 40 myńnan asady dep kútilip otyr. Al mektep bitiretinderdiń sany 11-14 myń aralyǵynda. Sondyqtan kem degende 10-15 mektep salý qajet. Bul jerde másele tek qarjy men qurylysqa baılanysty emes. Keminde 1500-2000 pedagog qajet. Qalanyń ósýine baılanysty osyndaı máseleler týyndaı beredi. Bir jaǵynan bul úlken másele bolsa, ekinshi jaǵynan múmkindik, — dedi Jeńis Qasymbek «Ýáde» baǵdarlamasynyń 100-shyǵarylymynda.
Sonymen qatar ol elordada jańa mektepterdiń qajettilikke qaraı salynatynyn atap ótti.
— Nura aýdanynda balalar sany ósip, tapshylyq baıqalsa, sol jerde kóbirek mektep salamyz. Almaty aýdanynda, Saryarqa aýdanynda qajettilik bolsa, sol aýmaqtarda da salynady. Bul tek mektepterge ǵana qatysty emes, jalpy aýrýhanalar, emhanalar jáne basqa da áleýmettik nysandarǵa da qatysty, — dedi ákim.
Sondaı-aq Jeńis Qasymbek Memleket basshysynyń tapsyrmasyna sáıkes 15 oqýshylar saraıyn salý mindeti turǵanyn, onyń beseýiniń ekeýi paıdalanýǵa berilgenin jáne bıyl taǵy ekeýi ashylatynyn aıtty.
Aıta keteıik, osyǵan deıin Shyǵys Qazaqstan mektepterine dırektorlar jetispeı jatqanyn jazǵanbyz. Oblystyq Bilim basqarmasynyń málimetinshe, búginde 48 bilim ordasynda basshy joq.
