Astanada mektep tamaǵyn daıyndaıtyn kombınat ashyla ma - Basqarma jaýaby
ASTANA. QazAqparat - Astanada mekteptegi tamaqtandyrý kombınatyn bıznespen seriktestik aıasynda ǵana turǵyzýǵa bolady. Kombınat jaıly osy pikirdi Astana qalalyq bilim basqarmasynyń basshysy Ánýar Janǵozın aıtty, dep habarlaıdy QazAqparat tilshisi.
«Eger kombınatty turǵyzýǵa daıyn adamdar tabylyp, osy arqyly sapa kóteriletinine, olardyń tamaqtandyrýdy túrlendire alatynyna kóz jetkizsek, álbette, bul qadamǵa baramyz (...) Qazirgi ýaqytta ınvestorlarmen naqty kelissózder júrgizip jatyrmyz. Sheshim jaqyn arada qabyldanady», - dedi Ánýar Janǵozın ákimdikte ótken baspasóz máslıhatynda.
Onyń aıtýynsha, taldaý jumystary kórsetip otyrǵandaı, osyndaı kombınattyń turǵyzylýy birqatar máseleni sheshýge jol ashady. Eń birinshi kezekte, azyq-túliktiń kóptep alynýynyń arqasynda tamaq ázirleý quny tómendep, sapasy da arta túsedi. Sebebi, azyq-túlik tikeleı fermerlik sharýashylyqtardan, jemis-jıdek, kókónis ósiretin óndirýshilerden jetkiziletin bolady.
Jalpy, Astanada mekteptegi tamaqtandyrýdy jolǵa qoıatyn kombınatty turǵyzý týraly bastama burynnan aıtylyp kele jatyr.
Eske salaıyq, bilim basqarmasy ótkizgen búgingi baspasóz máslıhatynda mektep ashanasynda onlaın tólem júıesin engizý jaıy aıtyldy. Onyń arqasynda ata-analar balasynyń qandaı tamaq ishkenin bilip otyrady.
Sonymen qatar, elordalyq mektepterdiń as daıyndaý bólmelerine beınekamera ornatylýy múmkin.
