Astanada mektep saıttaryn qurý bastamasynyń sátsiz bolǵanyn moıyndaý kerek - I.Tasmaǵambetov
ASTANA. 28 tamyz. QazAqparat - Astanada ótip jatqan Qazaqstan pedagogtarynyń Tamyz keńesi barysynda Astana qalasynyń ákimi Imanǵalı Tasmaǵambetov mektep saıttaryn qurý jumysyn synǵa alyp, ol bastamanyń sátsiz bolǵanyn moıyndady.
«Onyń eki sebebi bar», - dedi qala ákimi. «Birinshiden, oqýshylardyń saıtqa degen qyzyǵýshylyǵy joq. Ekinshiden, ustazdardyń ózi bul bastamaǵa nemquraıly qaraýda. Sebebi mektep muǵalimderi áli de Internetten alshaq júredi. Sizder kompıýterge jaqyndaýǵa da qorqasyzdar», - dep atap ótti ol. Qala ákiminiń aıtýynsha, Batys elderinde mektepterdiń kúndelikti jumysy saıttan bastalady. Onda sabaq kestesi, mekteptiń ómiriniń tolyq kúntizbesi, sektsııalardyń ótý ýaqyty, jınalystar, sport jarystary men qosymsha sabaqtar týraly tolyq aqparat beriledi. Sondaı-aq oqýshylar men ustazdardyń týǵan kúnderi de saıtqa únemi shyǵarylyp otyrady. «Mine, biz osyndaı tájirıbeni engizetin bolsaq, mektep ómiri múldem basqa dárejege kóteriletin bolady», - deıdi I.Tasmaǵambetov.
