Astanada ınternetsiz jumys isteıtin tsıfrlyq oqý stantsııalary iske qosyldy
ASTANA. KAZINFORM — Astanada «Almatykitap» baspasy qaıyrymdylyq jobasy aıasynda mektepter men kitaphanalarǵa arnalǵan ınternetsiz jumys isteıtin zamanaýı tsıfrlyq resýrstarmen jáne jasandy ıntellekt quraldarymen jabdyqtalǵan TopIQ-MobilBox elektrondyq oqý stantsııalaryn tabystady. Bul týraly elorda ákimdigi málim etti.
TopIQ-MobilBox — oqý úderisin qoldaýǵa arnalǵan avtonomdy oqý stantsııasy. Qurylǵy shalǵaı eldi mekenderdegi jáne shetkeri qala mektepterindegi oqýshylar men muǵalimderge oqý kontentin erkin paıdalanýǵa múmkindik beredi.
Oqý stantsııasyna qazaq jáne orys tilderindegi 395 elektrondyq oqýlyq pen kórkem ádebı kitap, beınematerıaldar, aýdıokontent, mýltfılmder, ınteraktıvti tapsyrmalar men testter engizilgen.
Jobanyń negizgi maqsaty — Qazaqstan Respýblıkasy Prezıdentiniń «Kitap oqıtyn ult» bastamasyn qoldaý, eldegi shaǵyn jınaqty mektepterge, kitaphanalarǵa jáne pedagogıkalyq kolledjderge kómek kórsetý, olardy zamanaýı oqý quraldarymen qamtamasyz etý jáne bilim berý sapasyn arttyrýǵa úles qosý.
Joba aıasynda Jańa jyl qarsańynda «Almatykitap» baspasy otanymyzdyń 20 óńirdegi tsıfrlyq resýrstarǵa qoljetimdiligi shekteýli shaǵyn jınaqty jáne shet aımaqtardaǵy mektepterge árqaısysynyń quny 400 000 teńge bolatyn 1000 bilim berý stantsııalaryn syıǵa tartty.
Sonyń ishinde TopIQ-MobilBox oqý stantsııalary Astana qalasy men Aqmola oblysynyń shaǵyn jınaqty mektepterine, sondaı-aq TopIQ.kz platformasyn úzdik paıdalanǵan jáne respýblıkalyq Leader TopIQ baıqaýynda jeńimpazdary kóp shyqqan 103 mektebine jańajyldyq syı retinde tabystaldy.
«Almatykitap» baspasynyń prezıdenti Gaýhar Saımasaeva jobanyń qalaı dúnıege kelgenin aıtyp berdi.
«Bul — „Almatykitap“ baspasynyń úlken jobasy. Bizdiń TopIQ oqý stantsııalarymyz ben platformamyz 6 jyldan beri jumys istep kele jatyr.
Kóptegen mektepter onyń ıgiligin kórip júr. 2000 mektepte oqıtyn 2 mıllıon oqýshy sabaqtaryna qoldanady. Bul — Astana sııaqty iri qalalar men oblys ortalyqtarynyń mektepteri.
Al shalǵaı aýyldaǵy mektepter she, olarǵa qalaı jetkizemiz degen suraqqa jaýap izdedik. Sonyń nátıjesinde osy joba dúnıege keldi. Osy platformadaǵy barlyq bazany TopIQ-MobilBox oqý stantsııasyna salyp, 1000 shaǵyn komplektili mektepke, 50-ge jýyq balalar kitaphanalaryna syılaıyq degen ıdeıa keldi. Árıne, muny isteıtin seriktester tabý, ony isteý ońaı bolǵan joq, degenmen 8 aıda istep shyqtyq.
400-ge jýyq oqýlyq, sondaı-aq odan basqa ádebı kitaptar bar.
Qamqor ıntellektýaldy kómekshisi platformanyń ishine engizilgen. Muǵalimderge, balalarǵa da kómekshi qural bolady.
Aldaǵy ýaqytta «1000 mektep» degen qaýymdastyq quryp, aýyldarǵa baryp, oqý protsesine qandaı yqpaly bolǵanyna qatysty zertteý júrgizetin bolamyz», — dedi «Almatykitap» baspasynyń prezıdenti.
Aıta keteıik, buǵan deıin kolledj oqytýshylary jasandy ıntellekt quraldaryn meńgere bastaǵanyn jazdyq.