Astanada mektep oqýshylary jeńistiń 70 jyldyǵyna arnalǵan patrıottyq aktsııaǵa qatysady

ASTANA. QazAqparat - Búgin, 7 sáýir kúni Mahambet Ótemisuly atyndaǵy oqýshylar saraıynda Uly Otan soǵysyndaǵy Jeńistiń 70 jyldyǵyna arnalǵan «Kóktemniń izgi kúnderi - 2015» atty dástúrli patrıottyq aktsııasy ótedi, dep habarlady Astana qalasy ákimdiginiń resmı saıtynda.

Aktsııa Oqýshylar saraıynyń foıesinde «Dalalyq poshta» - «Ardagerge jazylǵan hattar» atty sharadan bastalady. Bul poshta arqyly oqýshylar ardagerlerge ózderiniń nıet-tilekterin jetkizedi. «Dalalyq poshtanyń» janynda árdaıym jedel kezekshiler turady.

Sonymen qatar, foıede soǵys jyldaryna arnalǵan foto kórme ashylady, onda zulmat jyldardyń kórinisi retinde eski fotolardy ǵana emes, sol ýaqytta paıdalanylǵan zattardy da (eski fotoapparat, patefon, eski fotoalbomdar) tamashalaýǵa bolady. «Zamandas» jastar halyq teatrynyń shákirtteri aktsııaǵa qatysýshylardy sýretke túsýge shaqyrady.

7 sáýirde Oqýshylar saraıynda «Patrıottyq-soǵys ánderi teatry» atty saıys ótkiziledi. Maqsaty - azamattyq partrıotızmge tárbıeleý jáne dástúrlerdi saqtaý, el tarıhy men Uly Otan soǵysy ardagerlerin ardaqtaý. Atalǵan saıys 2 kezeńnen turady. Birinshi irikteý kezeńinde qalalyq mektep, lıtseı, gımnazııa, kolledjderdiń balalar men jasóspirimder shyǵarmashylyq ujymdary óz ónerlerin ortaǵa salady. Іrikteý kezeńinde soǵys jyldaryndaǵy ánderge sahnalyq qoıylymdar kórsetiledi. Ádil qazylar alqasy ár saıyskerdiń vokaldyq sheberlikterin, oryndalatyn týyndyǵa baılanysty óz baǵasyn beretin bolady.

Іrikteý kezeńiniń qorytyndysy boıynsha 15 sáýirde negizgi ІІ kezeńge 7 sahnalyq kórinis joldama alady. Al eń úzdik dep tanylǵan kórinister gala-kontsertte kópshilik nazaryna usynylady.

Shara barysynda oqýshylar arnaıy bezendirilgen shaǵyn avtobýspen ardagerlerdiń úıine baryp, «Dalalyq poshtaǵa» jınalǵan oqýshylardyń hattaryn taratady.

Aktsııa 2015 jyldyń 6 mamyrynda ótetin gala-kontsertpen qorytyndylanady.